औरंगाबाद: एसटीच्या औरंगाबाद आगार क्रमांक दोन येथील आगार व्यवस्थापकांच्या दालनात भारतरत्न डॉ. बाबासाहेब आंबेडकर यांची प्रतिमा लोखंडी पेटीत बंद करून ठेवण्यात आली होती. ही बाब रिपब्लिकन विद्यार्थी सेनेच्या लक्षात आल्यानंतर त्यांनी याचा जाब विचारला. त्यानंतर आगार प्रमुखांनी प्रतिमा दालनात लावली.

आगार क्रमांक दोन येथील प्रमुखांच्या दालनात डॉ. बाबासाहेबांची प्रतिमा एका लोखंडी पेटीत बंद करून ठेवण्यात आली होती. रिपब्लिकन विद्यार्थी सेनेचे पदाधिकारी महामंडळाने पाच कर्मचाऱ्यांना निलंबित केल्याप्रकरणाची माहिती घेण्यासाठी आगार क्रमांक दोनचे प्रमुख सुनील शिंदे यांच्या दालनात गेले होते. त्यावेळी डॉ. आंबेडकरांची प्रतिमा नसल्याचे त्यांच्या लक्षात आले. त्यांनी याचा जाब विचारला असता तेथील कर्मचाऱ्यांनी सांगितले, की १४ एप्रिलनंतर डॉ. आंबेडकरांची प्रतिमा काढून ती लोखंडी पेटीत ठेवण्यात आली.

पदाधिकाऱ्यांनी याचा जाब विचारला असता शिंदे यांनी डॉ. आंबेडकर यांची पेटीतील प्रतिमा काढून ती दालनात लावली. याप्रकरणी चौकशी करून दोषींवर कारवाई करावी, अशी मागणी केली. यावेळी सचिन निकम, अतुल कांबळे, गुणरत्न सोनवणे, सचिन भुईगळ, नितीन दाभाडे, सिद्धार्थ सदाशिवे आदींची उपस्थिती होती.

"मुद्दाम हा प्रकार झालेला नाही. बाबासाहेबांची आणि शिवाजी महाराजांची मोठी फ्रेम आहे. छोटे फोटो अभिवादनाचा कार्यक्रम झाल्यानंतर शिपाई जपून ठेवून देतात. वर्षभरात जयंतीचे ४५ उपक्रम साजरे करतो."-सुनील शिंदे, आगार दोन व्यवस्थापक, मध्यवर्ती बसस्थानक