छत्रपती संभाजीनगर : गेल्या दोन दिवसांपासून मी छत्रपती संभाजीनगर येथे लोकसभा निवडणुकीसाठी ठाण मांडून आहे. ज्यांचा कार्यक्रम करायचा होता, त्यांचा करेक्ट कार्यक्रम मी करणारच आहे, असा सूचक इशारा मुख्यमंत्री एकनाथ शिंदे यांनी दिला. तसेच छत्रपती संभाजीनगर आणि धाराशिव शहराच्या नामांतरविरोधात कोर्टात जाणारे लोक महाविकास आघाडीचे होते, असा आरोपही त्यांनी केला.

शिवसेना महायुतीचे उमेदवार संदीपान भूमरे यांच्या प्राचरार्थ मुख्यमंत्री शिंदे हे दोन दिवसांपासून छत्रपती संभाजीनगरच्या दौऱ्यावर आहेत. मंगळवारी वाळूज-बजाजनगर येथे सभा घेतल्यानंतर त्यांनी बुधवारी दुपारी पत्रकारांशी संवाद साधला. ते म्हणाले, छत्रपती संभाजीनगर आणि धाराशीवच्या नामकरणाला न्यायालयाने मान्यता दिली.

यामुळे बाळासाहेब ठाकरे यांचे स्वप्न पूर्ण झालं. कोर्टाचे मी आभार मानतो. छत्रपती संभाजीनगर शहर औरंग्याचे झाले पाहिजे, अशी काही लोकांची इच्छा होती. महाविकास आघाडीच्या काही लोकांनी नामांतराविरोधात याचिका दाखल केली होती. मात्र, मी जिथे जातो तिथे मला यश मिळते. आज इथेही यश मिळाले आहे, असे वक्तव्य मुख्यमंत्र्यांनी केले.

औरंगाबाद आणि उस्मानाबादचे नाव बदलण्यासंबंधीची सर्व प्रकरणे बुधवारी मुंबई उच्च न्यायालयाने फेटाळून लावली. हा निर्णय आमच्यासाठी धक्कादायक आहे. सर्वोच्च न्यायालयात आव्हान देण्याचा पर्याय आमच्याकडे अजूनही आहे. न्यायालयाच्या आदेशाचा अभ्यास केल्यानंतर आम्ही पुढील पाऊल उचलू.

- मोहम्मद हिशाम उस्मानी, याचिकाकर्ते.