शेतकऱ्यांना हेक्टरी ५० हजार रुपये मदत द्या ः आमदार डॉ. हिकमत उढाण घनसावंगी, ता.२१ : पीक परिस्थितीचा आढावा घेण्यासाठी कृषिमंत्री दत्तात्रय भरणे यांच्या उपस्थितीत आयोजित ऑनलाइन बैठकीस आमदार डॉ. हिकमत उढाण यांनी उपस्थित राहून मतदारसंघातील दुष्काळसदृश परिस्थितीचे गांभीर्य मांडले. घनसावंगी विधानसभा मतदारसंघात पावसाचा दीर्घकाळ खंड पडल्याने शेती पिकांवर मोठा परिणाम झाला आहे. अनेक भागांतील सोयाबीन, कापूस, तूर यांसह विविध पिके पावसाअभावी वाळून गेली असून, पिके करपून काळवंडल्याचे चित्र निर्माण झाले आहे. यामुळे शेतकरी मोठ्या आर्थिक संकटाला सामोरे जात आहेत. सदर बैठकीत आमदार डॉ. हिकमत उढाण यांनी मतदारसंघातील प्रत्यक्ष पीक परिस्थिती लक्षात घेता मतदारसंघातील दुष्काळसदृश परिस्थिती लक्षात घेऊन दुष्काळ घोषित करावा, नुकसानग्रस्त शेतकऱ्यांना हेक्टरी ५० हजार रुपये आर्थिक मदत देण्यात यावी, राज्यातील कर्जमाफी योजनेची अंमलबजावणी जलद गतीने करण्यात यावी. २०२५-२६ मध्ये पीककर्ज घेऊन यंदा थकबाकीदार झालेल्या शेतकऱ्यांचे कर्ज माफ करण्यात यावे. शेतकऱ्यांना नवीन पीककर्ज वाटप करण्यासाठी बँकांना स्पष्ट निर्देश देण्यात यावेत, अशी मागणी केली. ..... कोट पावसाच्या खंडामुळे झालेल्या पीक नुकसानीची गांभीर्याने दखल घेऊन शेतकऱ्यांना आर्थिक दिलासा देणे गरजेचा आहे. त्यांच्या नुकसानीची योग्य दखल घेतली जावी आणि शासनाकडून तातडीने मदत मिळावी, यासाठी आपण कटिबद्ध आहोत. -डॉ. हिकमत उढाण, आमदार