वाळूज महानगर (जि.औरंगाबाद) : अवघ्या तीन महिन्याच्या चिमुकल्याचे पित्यानेच अपहरण करून पळ काढल्यानंतर पोटच्या गोळ्यासाठी आईने पोलिसांच्या मदतीने परिसर पिंजून काढला. दरम्यान, पोलिस आपल्या मागावर असल्याचे कुणकुण लागताच घाबरलेल्या आरोपीने चिमुकल्याला रांजणगाव (शेणपुंजी) (Waluj) येथील त्याच्या नातेवाईकांच्या स्वाधीन केल्याने अखेर पंधरा तासानंतर (Aurangabad) चिमुकला पोटचा गोळा मिळाल्याने आईसह पोलिसांनी सुटकेचा निःश्वास सोडला. पत्नी अपर्णा चिमुकल्या बाळाला (Crime Against Child) घेऊन माहेरी जात असताना आरोपीने त्यांची रिक्षा रस्त्यात अडवून तीन महिन्याच्या बाळाचे शनिवारी अपहरण केले. त्यानंतर पोटच्या गोळ्यासाठी अपर्णाने पोलीस ठाण्यात धाव घेतली. त्यामुळे आरोपीच्या शोधार्थ पोलिसांनी परिसर पिंजून काढत असताना आरोपीचे करमाळा (ता. जि. नगर) येथे लोकेशन मिळाले.

त्यामुळे विवाहितेसह तिचे नातेवाईक पोलिसांना घेऊन करमाळ्याला गेले. दरम्यान पोलिस आपल्या मागावर आहेत, आपण पकडले गेल्यास आपल्याला पोलीस मारहाण करतील, शिवाय तुरुंगाची हवाही खावी लागेल, या धाकाने आरोपी संदीप कदमने रांजणगाव (शेणपुंजी) येथे असलेल्या मामा व आजी यांच्या हवाली तीन महिन्याच्या चिमुकल्याला केले आणि तेथून पळ काढला. त्यानंतर मामा व आजीने अपर्णा आणि त्यांच्या नातेवाईकाला बाळ मिळाल्याची माहिती दिली. त्यामुळे अपर्णा व तीचे नातेवाईक रांजणगाव येथे आले. बाळ सुखरूप मिळताच अपर्णाने हंबरडा फोडत बाळाला कडकडून मिठी मारली.