औरंगाबाद : औरंगाबाद विभाग कृषी सहसंचालक कार्यालयांतर्गत असलेल्या औरंगाबाद, जालना, बीड या जिल्ह्यांमध्ये यंदा हरभऱ्याच्या लागवड क्षेत्रात वाढ झाली आहे. विभागांतर्गत तीन जिल्ह्यातील ६ लाख ६४ हजार हेक्‍टर सर्वसाधारण क्षेत्राच्या तुलनेत ५ लाख ४८ हजार हेक्‍टरवर अर्थात ८२.५३ टक्‍के क्षेत्रावर रब्बीची पेरणी झाली आहे. लांबणीवर पडलेल्या पावसाचा थेट रब्बी पेरणीवर परिणाम झाल्याचे दिसून आले आहे.

औरंगाबाद जिल्ह्यात रब्बीचे सर्वसाधारण क्षेत्र २ लाख ८ हजार १८८ हेक्‍टर क्षेत्र आहे. याच्या तुलनेत केवळ ५४.८१ टक्‍ म्हणजे १ लाख १४ हजार ९७ हेक्‍टरवर रब्बी पेरणी झाली आहे. जालना जिल्ह्यात रब्बीचे सर्वसाधारण क्षेत्र १ लाख ७४ हजार ३६८ हेक्‍टर आहे. तथापि प्रत्यक्षात ९२ टक्‍के क्षेत्रावर म्हणजे १ लाख ६० हजार ८६५ हेक्‍टरवर पेरण्या झाल्या आहेत. बीड जिल्ह्यात २ लाख ८१ हजार ४८० हेक्‍टर सर्वसाधारण क्षेत्रापैकी ९७ टक्‍के क्षेत्रावर म्हणजे २ लाख ७३ हजार ९० हेक्‍टरवर रब्बी पेरणी झाली आहे.

१ लाख ८७ हजार हेक्‍टरवर हरभरा
औरंगाबाद, जालना व बीड हे तीन जिल्हे मिळून हरभऱ्याचे सर्वसाधारण क्षेत्र १ लाख ६९ हजार ५४७ हेक्‍टर आहे. त्या तुलनेत हरभऱ्याची सर्वसाधारण क्षेत्राच्या पुढे जावून ११० टक्‍के क्षेत्रावर अर्थात १ लाख ८७ हजार ६८२ हेक्‍टरवर हरभऱ्याची पेरणी झाली आहे. इतर कडधान्याचे सर्वसाधारण क्षेत्र ११८ हेक्‍टर ८० गुंठे असतांना प्रत्यक्षात इतर कडधान्यांची ३०१ हेक्‍टरवर पेरणी झाली आहे.

पीकनिहाय पेरणी
गहू : ९३ हजार ४३१ हेक्‍टर
मका : २५ हजार ४३० हेक्‍टर
इतर तृणधान्य : ९३५ हेक्‍टर
करडई : ३३१ हेक्‍टर
जवस : ११२ हेक्‍टर
तीळ : २ हेक्‍टर
सुर्यफूल : २७६ हेक्‍टर
मोहरी : २९ हेक्‍टर
इतर गळीतधान्य : ८६ हेक्‍टर

Edited - Ganesh Pitekar