जरंडी : संजय गांधी, श्रावण बाळ आणि अंध अपंग योजनेच्या ८ हजार ९६६ आणि अपंग लाभार्थी ६८८ या लाभार्थ्यांच्या खात्यावर दोन कोटी ४२ लक्ष ५५ हजार इतकी रक्कम वर्ग करण्यात आली असल्याची माहिती तहसीलदार रमेश जसवंत यांनी गुरुवारी दिली. यामुळे लाभार्थ्यांचा गुढीपाडवा सण गोड होणार आहे.

सोयगाव तालुक्यात गुढीपाडवा सणाच्या दृष्टीने मार्च अखेरीस कामात गुंतलेल्या तहसीलच्या संजय गांधी आणि श्रावण बाळ योजनेच्या लाभार्थ्यांच्या खात्यावर २ कोटी ४२ लक्ष ५५ हजार इतकी रक्कम वर्ग केली आहे. त्यामुळे गुढीपाडवा आधीच संजय गांधी, श्रावण बाळ आणि अपंग लाभार्थ्यांसाठी गोड बातमी हाती आली आहे. अपंग लाभार्थ्यांसाठी स्वतंत्र १९ लक्ष ९६ हजार रक्कम वर्ग करण्यात आल्याची माहिती सूत्रांनी दिली आहे.

केंद्र शासनाच्या इंदिरा गांधी वृद्धापकाळ योजनेच्या लाभार्थ्यांच्या मानधन तब्बल जुलै २०२१ पासून अडकले होते. या मानधनाचाही मार्ग मोकळा झालेला असून केंद्राच्या इंदिरा गांधी वृद्धापकाळ योजनेच्या ५९६ लाभार्थ्यांनाही गुढीपाडवा सणात मानधन मिळणार असून त्यासाठी आता रक्कम खात्यात वर्ग करण्यात येत असल्याने लाभार्थ्यांना दिलासा मिळाला आहे.