औरंगाबाद : मी साधा माणूस आहे, माझ्याकडे शेती, कारखाने, फार्महाऊस, बंगले काहीच नाही, त्यामुळे मी किरीट सोमय्याला घाबरण्याचा प्रश्नच निर्माण होत नाही. किरीट सोमय्याच मला घाबरतो, अशा शब्दांत खैरे यांनी सोमय्या यांची खिल्ली उडवली. शिवसेना नेते चंद्रकांत खैरे यांच्या नेतृत्वाखाली सोमय्या विरोधात आंदोलन आणि क्रांतीचौक पोलिस स्टेशनमध्ये तक्रार दाखल करण्यात आली. पोलिस स्टेशनमधून बाहेर पडताना खैरे यांनी प्रसारमाध्यमांशी बोलताना त्यांनी श्री. सोमय्या यांची टिंगल उडवली. तुम्ही सोमय्याला घाबरत नाही का? असा सवाल केला तेव्हा खैरे म्हणाले, सोमय्याच मला घाबरतो, मी त्याला ए किरीट अशी हाक मारत होतो.

विमानात मी त्याचा हात पकडून खेचले होते, लोकसभेत देखील त्याला मी शक्ती कपूर म्हणायचो, त्यामुळे मी नाही तर तोच मला घाबरतो, असा दावा खैरे यांनी केला. माझ्याजवळ संपत्ती नाही, कारखाने, फार्महाऊस, शेती काहीही नाही. मी साधा माणूस आहे, त्यामुळे कुणालाच घाबरत नाही. माझ्याकडे जे आहे तेच मी इतरांना देतो, अगदी खिशात शंभर रुपये असले तरी ते देऊन टाकतो, असे ते म्हणाले.

युती सरकारमध्ये मंत्री, दोन वेळा आमदार, तीनदा खासदार असून देखील तुम्ही काहीच कसे कमावले नाही? या गुगलीवरही खैरे यांनी` मी मतांची खंडणी मागितली, पण पैशाची खंडणी कधी आयुष्यात मागितली नाही, असेही खैरे म्हणाले. माजी महापौर नंदकुमार घोडेले, शिवसेनेचे जिल्हाप्रमुख नरेंद्र त्रिवेदी, उपजिल्हाप्रमुख आनंद तांदुळवाडीकर, पूर्वचे शहरप्रमुख विश्वनाथ स्वामी, पूर्वचे विधानसभा संघटक राजू वैद्य, गोपाळ कुलकर्णी, अशोक पटवर्धन, अनिल जैस्वाल, वीरभद्र गादगे आदींची उपस्थिती होती.