छत्रपती संभाजीनगर : शहरात अभियांत्रिकी, वैद्यकीय शिक्षण देणाऱ्या संस्था आहेत. असे असले तरीही इथला विद्यार्थी पुणे-मुंबई येथे रोजगारासाठी भटकंती करतो. येथे उद्योगासाठी मोठ्या सोयी-सुविधा उपलब्ध आहेत. त्यामुळे शहरात आयटी हब झाले तर मराठवाड्यातील तरुणांना मराठवाड्यातच रोजगार मिळेल, अशी अपेक्षा शहरातील विविध राजकीय पक्षांचे कार्यकर्ते, पदाधिकारी यांनी ‘सकाळ संवाद’ कार्यक्रमात शुक्रवारी (ता. ५) व्यक्त केली.

यावेळी आपले पक्षातील हेवेदावे बाजूला ठेवत या प्रतिनिधींनी एक सामाजिक भावना ठेवत दिलखुलास चर्चा केली. यात भाजपचे शिवाजी दांडगे, शिवाजी भिंगारे, राष्ट्रवादी काँग्रेसचे प्रदीप विखे, रामेश्वर कदम, शिवसेनेचे सतीश बोरनारे, मारुती वराडे, अनिल करंगळे, अक्षय जायभाय, गणेश मस्के यांनी सहभाग घेतला. ते म्हणाले, शहरात महापालिकेने दर्जेदार मैदाने, एक दिवस आड पाण्याचे पाणी उपलब्ध करून द्यायला हवे.

शहरामध्ये विविध शैक्षणिक संस्था असल्या तरी येथे मोठ्या प्रमाणात रोजगार निर्मितीचा अभाव दिसून येतो. त्यामुळे शहरामध्ये आयटी इंडस्ट्री व इतर उद्योगव्यवसाय यायला हवेत. जिल्ह्यामध्ये वाचन संस्कृती रुजविण्यासाठी विविध उपक्रम राबविण्याची गरज आहे, अशी अपेक्षाही त्यांनी व्यक्त केली.

वाहतूक कोंडी सोडवावी

शहरवासीयांना मोठ्या प्रमाणात वाहतूक कोंडीचा सामना करावा लागतो. खास करून दर्ग्याकडून बीड बायपासकडे जाणाऱ्या रस्त्यावर ही समस्या अधिक आहे. आकाशवाणी चौक, वाळूज, दौलताबाद रस्ता या ठिकाणीही ही समस्या आहे. ही वाहतूक कोंडी सोडवण्यासाठी प्रशासनाने ठोस पावले उचलणे गरजेचे असल्याचे या चर्चेतून समोर आले.