फुलंब्री (जि. छत्रपती संभाजीनगर) : जालना जिल्ह्यातील अंबड तालुक्यात अंतरवाली सराटी येथे सुरू असलेल्या आंदोलनात पोलिसांनी लाठीमार केल्याच्या निषेधार्थ फुलंब्री तालुक्यातील गेवराई पायगा येथील सरपंच मंगेश साबळे यांनी स्वतःची नवी कोरी मोटार जाळल्याची घटना शनिवारी (ता. २) पाल फाटा परिसरात घडली. फुलंब्रीतील महात्मा फुले चौकातही मराठा क्रांती मोर्चाच्या वतीने रास्ता रोको आंदोलन केले.

व्हीडिओ प्रचंड व्हायरल

सरपंच साबळे यांनी मागील गेल्या वर्षभरापूर्वी नऊ लाख ८० हजार रुपयांची मोटार घेतली होती. लाठीमाराचा निषेध म्हणून त्यांनी आपली मोटार पेट्रोल टाकून जाळली. याचा व्हीडिओ समाजमाध्यमांवर प्रचंड व्हायरल झाला आहे. या आंदोलनानंतर फुलंब्री पोलिसांनी सरपंच साबळे यांच्यासह साईनाथ बेडके, वसंत पाथ्रीकर यांना नोटीस बजावली आहे.

‘अन्यथा स्वतःला जिवंत जाळू घेऊ’

याबाबत शेतकरी संघटनेचे साईनाथ बेडके म्हणाले, की आता आम्ही कार जाळली. लाठीमार करणाऱ्या संबंधित अधिकारी व कर्मचाऱ्यांवर दोन दिवसांत कारवाई झाली नाही, तर आम्ही स्वतःलाही जिवंत जाळून घ्यायला मागेपुढे पाहणार नाही, असा इशारा त्यांनी दिला.