कन्नडः विविध मोटारसायकलीचे (ऑटो) स्पेअर पार्ट (सुटे भाग) ठेवलेल्या गोडाऊनवजा घरातून ऑटो पार्टसची चोरी करणाऱ्या दोन आरोपींना कन्नड शहर पोलिसांनी शुक्रवारी (ता.१) अटक केली असून एक आरोपी फरार झाला आहे.

पोलिसांनी वैभव गोरक्षनाथ गरुड (वय २४, रा.कनकावती नगर,कन्नड) शुभम अशोक कणसे (वय २२, या दोघांना अटक केली. तर संकेत बनसोडे (वय २५) हा पेंटर फरार झाला आहे.कन्नड शहर पोलिसांनी दिलेली अधिक माहिती अशी की, शहरातील नितीन नगर येथील इम्रान मोहसीन शेख यांचे चाळीसगाव रस्त्यावर गिरणी ग्राउंडसमोर ऑटो पार्टसचे दुकान आहे. दुकानासाठी लागणारे साहित्य साठवून ठेवण्यासाठी, त्यांनी हिवरखेडा रस्त्यावरील वाणी मंगल कार्यालयाजवळ सचिन येवले यांचे घर भाड्याने घेतले आहे. २९ नोव्हेंबर रोजी रात्री ९ वाजता त्यांनी दुकानासाठी काही साहित्य काढले आणि घराला कुलूप लावून घरी गेले.

दुसऱ्या दिवशी सकाळी ५ वाजता ते पुन्हा काही साहित्य आणण्यासाठी गेले असता, त्यांना त्या घराचे कुलूप तुटलेले दिसले. आत जाऊन पाहणी केली असता, दुकानातून कंपनीचे वेगवेगळ्या मोटारसायकलचे १२४ पिस्टन (किंमत अंदाजे ९३,७४०), विविध कंपन्यांच्या दुचाकीचे वॉल बॉक्स (किंमत अंदाजे ७,७००) आदी साहित्य असा एकूण १ लाख ११ हजार २९६ रुपयांचा माल चोरी गेल्याचे लक्षात आले. यानंतर त्यांनी कन्नड शहर पोलिस ठाण्यात तक्रार दिली.

एक दिवसाची पोलिस कोठडी

या तक्रारीवरून दाखल झालेल्या गुन्ह्याचा तपास करत असताना सहायक पोलिस निरीक्षक सचिन खटके यांनी वैभव गरुड, शुभम कणसे यांना अटक केली. संकेत बनसोडे हा फरार झाला. अटक केलेल्या दोघांना कन्नड न्यायालयात हजर केले असता एक दिवसाची पोलिस कोठडी सुनावली. आरोपींकडून पस्तीस हजार रुपये किमतीचा मुद्देमाल हस्तगत करण्यात आला आहे. पोलिस फरार आरोपीचा शोध घेण्यात असून अधिक तपास पोलिस निरीक्षक बाळासाहेब भापकर यांच्या मार्गदर्शनाखाली सहायक पोलिस निरीक्षक सचिन खटके हे करत आहेत.