औरंगाबाद : शहरात दोन दिवसात लॉकडाऊन लागणार असल्याची शनिवारी (ता.६) दुपारपासून अफवा पसरली. लॉकडाऊनच्या भितीने अनेकांनी किराणासह इतर साहित्य खरेदीसाठी मोठी गर्दी केली होती. जुना मोंढ्यातील किराणा मार्केट, शहगंज येथील मार्केटमध्ये पाय ठेवायलाही जागा नव्हती. अनेकांनी महिनाभराचे साहित्य खरेदी करून ठेवल्याचे व्यापाऱ्यांनी सांगितले.

दुपारनंतर अचानकपणे वाढलेल्या गर्दीमुळे किराणा व्यापाऱ्यांचा मोठा गोंधळ उडाला होता. अनेक ठिकाणी साहित्य खरेदीसाठी नागरिकांना वेटिंग करावी लागली. जुना मोंढा, औरंगपूरा, शहागंज, पीरबाजार, रेल्वेस्टेशन भाजीमंडई, जुना मोंढा येथील दुकानांसह शहराच्या सर्वच भागातील किराणा दुकानांवर जीवनाश्यक वस्तू खरेदीसाठी ग्राहकांची रिघ लागली. सर्व ग्राहकांच्या हातात साहित्याची लांबलचक यादी होती. भाजी मंडई, तेल भंडार, सर्व दुकानांमध्ये आज दिवाळीप्रमाणे गर्दी झाली होती. रात्री आठ ते नऊपर्यंत गर्दी कायम होती. मॉल, मोठ्या शॉप्समध्येही गर्दी दिसून आली. दिवाळीच्या काळात ज्या प्रमाणे खरेदीसाठी गर्दी असते अगदी तशीच गर्दी बाजारपेठेत झाली असल्याचे व्यापारी दिलीप गांधी यांनी सांगितले.

संपादन - गणेश पिटेकर