लोहगाव (जि.औरंगाबाद) : मराठवाडा मुक्तिसंग्राम दिनाच्या ध्वजवंदनासाठी औरंगाबाद दौऱ्यावर आलेल्या मुख्यमंत्र्यांना मराठा आरक्षणासाठी (Maratha Reservation) काळे झेंडे दाखवत ताफा अडविण्याच्या इशारा देणारे मराठा क्रांती ठोक मोर्चा (Maratha Kranti Thok Morcha) समन्वयक व स्वाभिमानी छावा मराठा संघटनेच्या ढाकेफळ-बिडकीन परिसरातील कार्यकर्त्यांना रात्रीच बिडकीन, पैठण औद्योगिक पोलिसांनी नजरकैदे केले आहे. शुक्रवार (ता.१७) मराठवाडा मुक्तीसंग्राम कार्यक्रमासाठी येणारे मुख्यमंत्री उद्धव ठाकरे (CM Uddhav Thackeray) हे मराठा समाज आरक्षण व इतर प्रलंबित मागण्या सोडवण्यासाठी दुर्लक्ष करत आहे. यासाठी मराठा क्रांती ठोक (Aurangabad) मोर्चाने मुख्यमंत्र्यांचा ताफा अडवूण काळे झेंडे दाखवण्याचा इशारा दिला होता. त्या पार्श्वभूमीवर पोलिस प्रशासनाने शहर व ग्रामीण भागातील मराठा समन्वयकांची गुरुवारी (ता.१६) रात्रीपासूनच धरपकड केली व सर्वांना नजरकैदेत ठेवण्यात आले आहे.

यात ढाकेफळ येथील मराठा क्रांती ठोक मोर्चाचे राज्य समन्वयक किरण काळे पाटील व कृष्णा पाटील उघडे यांना रात्री पैठण एमआयडीसी पोलिस ठाण्याचे सहायक पोलीस निरीक्षक भागवत नागरगोजे, तर बिडकीन ठाण्याचे सहायक पोलीस निरीक्षक संतोष माने यांनी स्वाभिमानी छावा संघटनेचे जिल्हाध्यक्ष मनोज पाटील मुरदारे, संतोष कुसेकर, दत्ता पाटील मोगल, विजय शेळके, आप्पासाहेब जाधव, अनिल कुटे, धनंजय चिरेकर, नारायण नरवडे, किशोर जाधव, गणेश जाधव यांना सकाळी आठ वाजता यांना ताब्यात घेतले.

आंदोलन तीव्र करणार

मराठा आरक्षण व मराठा समाजाच्या इतर प्रलंबित मागण्या सरकारने तात्काळ मान्य कराव्यात.सरकारने मराठा समाजाला खोटी आश्वासने देऊन आमची फसवणूक केली आहे. आम्ही सर्व पदाधिकारी आज मुख्यमंत्री उद्धव ठाकरे यांचा ताफा अडवुन काळे झेंडे दाखवणार होतो. मात्र सरकार पोलीस प्रशासनाला पुढे करून आमच आंदोलन दडण्याचा प्रयत्न सतत करत आहे. मराठा क्रांती ठोक मोर्चाच्या वतीने आम्ही राज्यभरात तीव्र आंदोलन हाती घेतले असुन जोपर्यंत मराठा समाजाला न्याय मिळत नाही तोपर्यंत एकाही मंत्री, खासदार, आमदाराला आम्ही कुठेही फिरकु देणार नाही.

किरण काळे पाटील, समन्वयक, मराठा क्रांती ठोक मोर्चा