छत्रपती संभाजीनगर : आयटकच्या अंगणवाडी कर्मचारी युनियनने राज्यव्यापी संप पुकाराला आहे. चौथ्या दिवशी गुरुवारी (ता. सात) अंगणवाडी सेविका आणि मदतनिसांनी जिल्हा परिषद ते जिल्हाधिकारी कार्यालयावर मोर्चा काढला. घोषणांनी परिसर दणाणून गेला होता. यामध्ये वैजापूर, गंगापूर, पैठण, छत्रपती संभाजीनगर ग्रामीण, शहर, फुलंब्री, सिल्लोड, सोयगाव, कन्नड, खुलताबाद आदी तालुक्यांतील १७ प्रकल्पांमधील पाच हजार अंगणवाडी सेविका सहभागी झाल्या होत्या.

प्रभारी उपमुख्य कार्यकारी अधिकारी (महिला व बालकल्याण) नीलेश राठोड यांना निवेदन देण्यात आले. विशेष म्हणजे जिल्हा परिषदेसमोर मोर्चातील महिलांची संख्या बघून पोलिसांनी लेबर कॉलनीतील रिकाम्या झालेल्या मैदानात मोर्चाचे विसर्जन करण्यास सांगितले. आयटकने मात्र महात्मा फुले पुतळा, औरंगपुरा, गुलमंडी मछली खडक, सिटी चौक, गांधी पुतळा मार्गे हा मोर्चा जिल्हाधिकारी कार्यालयावर धडकला. जिल्हाधिकारी यांना निवेदन देण्यात आले.

मोर्चाचे नेतृत्व अंगणवाडी कर्मचारी युनियन आयटकचे राज्य उपाध्यक्ष प्रा. राम बाहेती, जिल्हा सचिव व राज्य कोषाध्यक्ष तारा बनसोडे, राज्य सचिव शालिनी पगारे, संघटक अनिल जावळे, संगीता अंभोरे, मीरा आडसरे, उषा शेळके, गीता पांडे, ज्योती गायकवाड, माया भिवसाने, शीला साठे, वैशाली मकासरे, नूर जहा बेगम, शन्नो शेख, विलास शेंगुळे, प्रीतम घनघावे, अभय टाकसाळ, रंजना राठोड, अलका डिडोरे, गंगा जंजाळ, उषा गलांडे, अनिता पावडे, नीता कीर्तीशाही, वैशाली मकासरे, अर्चना घाटे, अनिता जाधव, राजेश्री रेड्डी आदींनी केले.

जिल्हाधिकारी कार्यालयासमोर झालेल्या जाहीर सभेत जिल्हा परिषद कर्मचारी महासंघाचे राज्य सरचिटणीस संजय महालंकर, लालबावटा शेतमजूर युनियनचे सिल्लोडचे पुढारी त्र्यंबक शेजूळ आदींची भाषणे झाली.मोर्चात तब्बल पाच हजार महिला सहभागी झाल्या होत्या. त्यामुळे जिल्हाधिकारी कार्यालयासमोरचा एकीकडचा रस्ता पूर्णपणे पाच तास बंद होता.