औरंगाबाद : मराठवाडा मुक्तिसंग्रामदिनी शुक्रवार (ता.१७) रोजी एमआयएमतर्फे चिकलठाणा विमानतळ ते सिद्धार्थ उद्यानापर्यंत मुख्यमंत्र्यांच्या ताफ्यावर पृष्पवृष्टी करून, तुतारी वाजवून हातात उपरोधिक फलक घेऊन मुख्यमंत्र्यांचे स्वागत केले जाणार आहे. या उपरोधिक आंदोलनासाठी गुरुवार (ता.१६) रोजी खासदार इम्तियाज जलील यांनी बुढीलाईन येथील कार्यालयात पदाधिकारी, कार्यकर्त्यांची बैठक घेतली.

मराठवाडा मुक्तिसंग्राम दिन, गणेशोत्सव, पैठण येथील संतपीठ व इतर विकासकामांच्या उद्‍घाटनासाठी मुख्यमंत्री शुक्रवारी औरंगाबादेत येत आहेत. स्वातंत्र्यपूर्व काळापासून मराठवाड्याकडे सर्वच राजकीय पक्षांनी दुर्लक्ष केल्यामुळे मराठवाड्याचा विकास खुंटला आहे. त्यातल्या त्यात मराठवाड्याची राजधानी अशी ओळख असलेल्या औरंगाबाद शहराचे सर्वांत मोठे नुकसान आतापर्यंत राजकीय नेत्यांनी केले.

मुख्यमंत्री उद्धव ठाकरे आणि शिवसेनेचे मंत्री नेहमीच औरंगाबाद शहरावर शिवसेनेचे प्रेम असल्याचे सांगतात. परंतु शहरातील मूलभूत प्रश्न सोडविण्यात शिवसेनेच्या १४ महापौरांना तसेच आतापर्यंत आमदार, खासदार असलेल्या नेत्यांना अपयश आले. त्यामुळे चिकलठाणा विमानतळापासून ते सिद्धार्थ उद्यानापर्यंत मानवी साखळी उभारून मुख्यमंत्र्यांचे तुतारी वाजवून, पुष्पवृष्टीने जंगी पण उपरोधिक स्वागत करून आभार व्यक्त करणार केले जाणार आहे. बैठकीप्रसंगी एमआयएमचे जिल्हाध्यक्ष अब्दुल समीर, शहराध्यक्ष शारेक नक्षबंदी, माजी नगरसेवक नासेर सिद्दिकी, पदाधिकारी, कार्यकर्त्यांची उपस्थिती होती.