छत्रपती संभाजीनगर : एकानंतर एक अशा तिघाजणांना एकच जागा विक्री करून तब्बल १७ लाख ४० हजार रुपयांचा गंडा घातल्याचा खळबळजनक प्रकार उघडकीस आला. हा प्रकार डिसेंबर २०२० ते जानेवारी २०२३ दरम्यान दुय्यम निबंधक कार्यालयात घडला. याप्रकरणी फसवणूक करणाऱ्याविरोधात सिटी चौक पोलिस ठाण्यात फसवणुकीचा गुन्हा दाखल करण्यात आला आहे. सुभाष दत्तु पाटील (वय ६५, रा. एन-७, सी २ सिडको) असे त्या आरोपीचे नाव आहे.

याप्रकरणी मुकुंद श्रीरंगराव जगदाळे (वय ५१, रा. प्रोझोन मॉलशेजारी, एमआयडीसी चिकलठाणा) यांच्या फिर्यादीनुसार, सुभाष आणि फिर्यादी ओळखीचे आहेत. दोघांमध्ये सुभाषच्या मोरहिरा येथील गट २६ मधील ७० आर (गुंठे) जमीन विक्रीचा पाच लाख ४० हजार रुपयांमध्ये व्यवहार झाला. दरम्यान सुभाषने २०२० मध्ये सहदुय्यम निबंधक कार्यालयात खरेदी खताद्वारे फिर्यादीला जमीन विक्री केली होती. दोघांच्या साक्ष, स्वाक्षऱ्यानंतर सर्व प्रक्रिया करुन फिर्यादीला जमिनीचा ताबा देण्यात आला होता.

पैसे येतील तसे विकतच गेला

आरोपी सुभाषने जमीन फिर्यादीच्या ताब्यात दिली खरी, मात्र सदर जमिनीचा फेर घेणे बाकी होते. सुभाष याने नेमका याचाच फायदा घेत मुकुंद यांना विक्री केलेली जमीन त्यांना माहिती होऊ न देता १२ ऑगस्ट २०२२ रोजी शिवाजी औताडे (रा. हर्सूल) यांना सहा लाख रुपयांत दुय्यम निबंधक कार्यालय तीन येथे खरेदीखत करून देत विक्री केली.

इतकेच नव्हे तर औताडे यांना विक्री केलेली मुकुंद यांची जमीन पुन्हा प्रकाश सुखदेव पाटील (रा. राठी संसार, पिसादेवी रस्ता) यांना १२ जानेवारी २०२३ रोजी सह दुय्यम निबंधक कार्यालय पाच येथे खरेदी खताद्वारे सहा लाख रुपयांमध्ये विक्री केली. विशेष म्हणजे आरोपीने तिन्ही वेळा जमीन विक्रीचे खरेदी खत करताना सहनिबंधक कार्यालये बदलली आणि पैसा येतील तशी जमीन विकत राहिला.

इतकेच नव्हे तर आरोपी सुभाष पाटीलविरोधात २०११ आणि २०१५ साली फसवणुकीचे गुन्हे दाखल असल्याचे समोर आले आहे. याप्रकरणी दाखल गुन्ह्याचा अधिक तपास उपनिरीक्षक उद्धव हाके हे करत आहेत.