करमाड : औरंगाबाद पोलिस अधीक्षकांचे पथक व करमाड पोलिसांनी रविवारी (ता.५) दुपारी पाठलाग करून औरंगाबाद-जालना मार्गावरील गोलटगाव फाट्यावर टेंपो (आयशर) अडविला. त्यातून सुमारे एक कोटीचा गुटखा जप्त केला. टेंपोचालकाला ताब्यात घेतले.या कारवाईत पोलिसांनी ८३ गोण्यांतील सुमारे एक कोटी पंचवीस हजार रुपयांचा नजर नावाचा गुटखा, पंधरा लाख रुपये किमतीचे आयशर (एमएच-०४, जेके-३६१५) व आयशरचालकास ताब्यात घेतले आहे.

अमरावतीहून औरंगाबाद मार्गे मुंबईकडे टेंपोतून गुटखा नेला जात असल्याची माहिती पोलिस उपअधीक्षक जयदत्त भवर यांना सकाळी मिळाली. करमाडचे पोलिस निरीक्षक राजेंद्र बोकडे यांना कळवून भवर यांनी तेथे धाव घेतली.बोकडे यांनी आपल्या सहकाऱ्यांसह जालना मार्गावरील शेकटा फाट्यावर सापळा लावला. दुपारी दीडच्या सुमारास संबंधित टेंपो करमाड पोलिस ठाण्याच्या हद्दीत आला. पथकाने पाठलाग करून गोलटगाव फाट्यावर टेंपो घेरला. तपासणी केली असता टेंपोत नजर नावाचा गुटख्याच्या मोठमोठ्या ८३ गोण्या आढळल्या. गुटख्याची किंमत सुमारे एक कोटी पंचवीस हजार रुपये आहे. चालकासह टेंपो ताब्यात घेऊन करमाड पोलिस ठाण्यात आणला. टेंपोसह एक कोटी १५ लाख २५ हजारांचा ऐवज जप्त करण्यात आला.

पोलिस अधीक्षक निमित गोयल, अपर पोलिस अधीक्षक डॉ. पवन बनसोडे यांच्या मार्गदर्शनात उपअधीक्षक भवर, पोलिस निरीक्षक बोकडे, सहायक निरीक्षक प्रशांत पाटील, उपनिरीक्षक राजू नागलोत आदींसह त्यांच्या सहकाऱ्यांनी ही कारवाई केली. दरम्यान, याप्रकरणी अन्न व भेसळ प्रतिबंधक विभागातर्फे फिर्याद येणे अपेक्षित आहे. तथापि, रविवार असल्याने सायंकाळी उशिरापर्यंत संबंधित विभागाच्या अधिकाऱ्यांशी संपर्क होऊ शकला नाही, असे करमाड पोलिसांकडून सांगण्यात आले.