लोहगाव (जि.औरंगाबाद) : बीड (Beed) येथील मराठा आरक्षणासह (Maratha Reservation) इतर मागण्यांसाठी निघणाऱ्या मराठा संघर्ष मोर्चात सामील होण्यासाठी व रायगड येथे शिवस्वराज्याभिषेक सोहळ्यासाठी निघालेल्या मराठा क्रांती ठोक मोर्चा (Maratha Kranti Thok Morcha) व स्वाभिमानी छावा संघटनेचे समन्वयक, जिल्हाध्यक्षांसह विविध पदाधिकाऱ्यांना बिडकीन, पैठण औद्योगिक वसाहत पोलिसांनी (Paithan MIDC Police) पकडून स्थानबद्ध केले आहे. मराठा समाजाच्या आरक्षण व इतर मागण्यांसाठी बीड येथे शिवसंग्राम संघटनेचे विनायक मेटे यांच्या नेतृत्वाखाली शनिवारी (ता.पाच) निघणाऱ्या मोर्चात व रायगड येथील शिव स्वराज्याभिषेक सोहळ्यासाठी जाणारे ढाकेफळ येथील मराठा क्रांती ठोक मोर्चा समन्वयक किरण पाटील काळे यांना आज शनिवारी सकाळी पैठण औद्योगिक वसाहत पोलिस स्टेशनच्या अर्चना पाटील, गुप्त शाखेचे राम मारकळ, पोलिस पाटील गोकुळ आढाव यांनी राहत्या घरातून ताब्यात घेतले. (Police Arrested Maratha Morcha's Office Bearers In Paithan)

बिडकीन पोलिसांनी (Bidkin Police) पैठण-औरंगाबाद रस्त्यावरील बिडकीन बसस्थानक परिसरातून मराठा क्रांती ठोक मोर्चा, स्वाभिमानी छावा संघटनेचे जिल्हाध्यक्ष मनोज मुरदारे, धनंजय चिरेकर, गणेश कळसकर, अभिजित लोणकर, विजय शेळके, अप्पासाहेब जाधव यांना बिडकीन पोलिस स्टेशन सहायक पोलिस निरीक्षक संतोष माने, फौजदार विकास पाटील, गुप्त शाखेचे भगवान जाधव यांनी ताब्यात घेऊन पोलिस ठाण्यात स्थानबद्ध केले आहे.