औरंगाबाद - एकीकडे पोलिस दलात असलेले भावजी घराच्या शोधात असताना दुसरीकडे पाहूणे म्हणून आलेल्या मेहुण्याने पोलिस दलातील भावजींची सात लाखांची नवी कोरी कारच पळवून नेली. विशेष म्हणजे ही कार औरंगाबाद ग्रामीण पोलिस दलाच्या पार्किंमधून लंपास करण्यात आली. याप्रकरणी संशयित मेहुणा, सासू, सासरे या तिघांविरोधात सिडको ठाण्यात गुन्हा दाखल करण्यात आला.

शुभम राजेंद्र अहिरे असे त्या संशयित आरोपी मेहुण्याचे तर राजेंद्र दौलत अहिरे व सासू (तिघेही, रा. आनंद लॉन्सच्या पाठईमागे, मोरेनगर, सटाणा, जि. नाशिक) अशी गुन्हे दाखल झालेल्यांची नावे आहेत. याप्रकरणी ३३ वर्षीय फिर्यादी हे औरंगाबाद पोलिस दलातील एका तालुक्याच्या पोलिस ठाण्यात नाईक पदावर काम करत असून ते पत्नीसह सिडकोतील एन-८ येथे मागील एक महिन्यांपासून राहतात. फिर्यादीकडे त्यांच्या नातेवाइकांची असलेली (एमएच-१५ एचजी-२७८१) ही कार फिर्यादीने ग्रामीण पोलिस मुख्यालयाच्या संरक्षित पार्किंगमध्ये लावली आणि १० जून रोजी कामानिमित्त मुंबई आणि तिकडून तिकडेच सामान शिफ्ट करण्यासाठी नोकरीच्या ठिकाणी गेले.

दरम्यान, १८ जून रोजी फिर्यादी नोकरीच्या ठिकाणी असताना त्यांच्या नातेवाइकांचा फोन आला आणि त्यांनी ‘दुपारी पावणे तीन वाजता हतनूर टोलनाका येथून आपली गाडी पास झाली आहे’ असे सांगितले. तसा फास्ट टॅगचा मेसेजही मिळाला. दरम्यान फिर्यादीने तत्काळ औरंगाबाद गाठून पार्किंगमध्ये कार पाहिली असता दिसली नाही, तिथून सिडकोतील घर पाहिले असता, घराला कुलूप दिसले, दरम्यान शेजाऱ्यांकडे ठेवलेली घराची चावी घेऊन घरात नेहमीच्या ठिकाणी कारची चावी पाहिली असता, चावीही दिसली नाही. त्यामुळे पाहूणे म्हणून आलेल्या मेहुणा, सासू, सासरे हेही दिसले नाहीत. त्यामुळे मेहुण्याला फोन केला असता, त्यांनी उडवाउडवीचे उत्तरे दिली. दरम्यान, शेजाऱ्यांनी तुमचे सासू सासरे तुमची कार घेऊन गेल्याचे सांगितले. याप्रकरणी वरील तिघांविरोधात सिडको पोलिस ठाण्यात गुन्हा दाखल झाला आहे.