वाळूजमहानगर : वाळूज महानगर परिसरातील महाराणा प्रताप चौक, मोहटादेवी चौक, कोलगेट चौक, मोरे चौक, जयभवानी चौक ही वर्दळीची ठिकाणे. या परिसरात कॉफी कॅफेंवर सर्वाधिक गर्दी होते. याविषयी तक्रारी आल्यानंतर पोलिसांच्या पथकाने शनिवारी (ता.९) छापे टाकले. यात महाराणा प्रताप चौकातील दोन ठिकाणी तीन जोडपी विक्षिप्त चाळे करताना आढळली. याप्रकरणी तीन जोडप्यांसह कॅफे सेंटर चालविणाऱ्या दोघांवर महाराष्ट्र पोलीस कायद्याच्या कलम ११० नुसार कारवाई करण्यात आली.

याविषयी वाळूज एमआयडीसी पोलीसांना अनेक संघटनांनी निवेदने दिली होती. वरिष्ठ पोलीस निरीक्षक अविनाश आघाव यांच्या मार्गदर्शनाखाली पोलीस उपनिरीक्षक अशोक इंगोले, पोलीस उपनिरीक्षक गणेश गिरी, पोलिस उपनिरीक्षक स्वाती उचित, पोलिस नाईक संदीप गाडगे, संजय पवार, प्रशांत सोनवणे, महिला पोलीस अंमलदार प्रियंका तळवंदे आदींच्या पथकाने शनिवारी वाळूज महानगर परिसरातील विविध ठिकाणी कॉफी कॅफेंवर छापे टाकले.

यात महाराणा प्रताप चौकातील कॅफे मार्क ३० व कॅफे डार्क लाईट या दोन ठिकाणी तीन जोडपी विक्षिप्त चाळे करताना आढळले. याप्रकरणी तीन जोडप्यांसह डार्क लाईट कॅफे सेंटरचा मालक नचिकेत वाळू लिंबोटे, कॅफे मार्क ३०चा मालक शुभम गजानन कानेकर यांच्यावर कलम ११० महाराष्ट्र पोलीस कायदा प्रमाणे कारवाई करण्यात आली.

पालकांनो...मुलांवर लक्ष असू द्या

गेल्या आठ ते दहा वर्षात वाळूज महानगर वेगाने प्रगती करीत आहे. छत्रपती संभाजीनगर शहराप्रमाणेच येथेही कॅफे कल्चर वाढले आहे. शाळा, कॉलेजच्या बाजूला किंवा उच्चभ्रू वसाहतीच्या बाजूला प्रायव्हसी म्हणून अनेक कॉफी कॅफे कॉलेजच्या मुला, मुलींना खासगी कंपार्टमेंट किंवा काळी काच असलेली ठिकाणे उपलब्ध करून देतात. वर्दळीच्या ठिकाणी, चौकांत काही तरुण अभ्यासाच्या नावाखाली अमली पदार्थ सेवन करून नको ते चाळे करताना दिसून येतात. याची कुणकुण पालकांना नसते, असे नाही. पण काही पालक लाडाकोडाने वाढविलेल्या पाल्यांच्या वागणुकीकडे दुर्लक्ष करतात. परंतु, यातून भविष्यात मुले वाममार्गाला लागण्याची शक्यता असते. म्हणूनच सूज्ञ पालकांनी पाल्यांवर बारकाईने लक्ष ठेवायला हवे. त्यांचे मित्र-मैत्रिणी कोण, शाळा-महाविद्यालयात मुले खरेच जातात का, बाहेर जात असतील तर नेमकी कुठे जातात, याविषयी पालकांनीच सजग राहण्याची वेळ आली आहे.