औरंगाबाद - जागतिक वारसा स्थळे असलेल्या अजिंठा आणि वेरुळ येथे नाईट टुरिझम सुरु करीत तेथील पर्यटनाला चालना देण्यात यावीत अशी मागणी औरंगाबाद पर्यटन विकास प्रतिष्ठानतर्फे (एटीडीएफ) पर्यटनमंत्री, केंद्रीय अर्थराज्यमंत्री डॉ. भागवत कराड यांच्याकडे निवेदनाव्दारे करण्यात आली आहे, अशी माहिती प्रतिष्ठानचे अध्यक्ष जसवंत सिंग यांनी बुधवारी (ता.२०) दिली. जागतिक वारसा दिनानिमित्ताने १८ एप्रिल रोजी कैलास लेणीच्या समोरील हिरवाळीवर ''त्रिकाल'' हा सांस्कृतिक कार्यक्रम घेण्यात आला. त्यानंतर रात्री १० वाजेपर्यंत लेणी विद्यृत रोषणाईसह पर्यटकांसाठी खुली ठेवण्यात आली होती. याला मोठा प्रतिसाद मिळाला. याच अनुषंगाने केंद्रीय सांस्कृतीक मंत्री प्रल्हाद सिंग पटेल यांनी देशातील १० वारसास्थळे रात्री ९ पर्यंत पर्यटकांसाठी खुली ठेवण्याचे जाहिर केले. यात महाराष्ट्रातील गडचिरोली जिल्ह्यातील चामोर्शी तालूक्यातील मार्कंडा देवस्थानाचा समावेश आहे. मध्यतंरी बिबिका मकबरा हे रात्री नऊ वाजेपर्यंत खुले ठेवण्यात आले होते. त्यावेळी पर्यटकांना याचा लाभ झाला. वाढत्या तापमानाचाही परिणाम पर्यटकांवर होत आहे. यामुळे याच धरतीवर आता वेरुळ लेणी सायंकाळी सात ते रात्री ११ पर्यंत सुरु ठेवाव्यात अशी मागणीही निवेदनात करण्यात आली आहे.