करमाड (जि.औरंगाबाद) - गेल्या दोन-तीन दिवसांपासुन पडत असलेल्या पावसाचा फायदा घेत शेंद्रा पंचतारांकित औद्योगिक वसाहतीतील विविध कंपन्यांकडून केमिकल्स युक्त लाल पाणी ओढ्याला सोडण्यात येत आहे. त्यामुळे या ओढ्याला लाल पाण्याचा पूर आल्याचा भास होतो. दरम्यान, यामुळे कुंभेफळ (ता. औरंगाबाद) ग्रामस्थांना मात्र पुन्हा एकदा मोठ्या आरोग्य संकटांस तोंड द्यावे लागू शकते असे आरोग्य तज्ञांचे मत आहे.

औद्योगिक वसाहतीतून वाहणाऱ्या या ओढ्याचे पाणी कुंभेफळ गावातून थेट तालुक्यात सर्वाधिक मोठ्या गणल्या जाणाऱ्या सुखना धरणात जाऊन मिसळते.

या धरणातुन पंचक्रोशीतील चाळीस गावांना पाण्याचा पुरवठा होत असल्याने काही वर्षापुर्वी या लाल पाण्यावरून मोठा गदारोळ झाला होता. मिनी मंत्रालय म्हणून ओळखल्या जाणाऱ्या जिल्हा परिषदेच्या बैठकीतही हा मुद्दा मोठ्या प्रमाणात गाजला होता. सदरील पाणी हे केमिकल मिश्रीत असल्याने ते कुंभेफळ गाव शिवारात असलेल्या हातपंप व विहिरीत मिसळल्याने येथील हजारो ग्रामस्थांना साथीच्या विविध आजारांना सामोरे जावे लागल्याची अनेक उदाहरणे आहेत. तथापि, मोठ्या प्रमाणात ओरड झाल्यानंतर हे पाणी बंद झाले होते.

दरम्यान, कुंभेफळ (ता.औरंगाबाद) व शेंद्रा औद्योगिक वसाहत परिसरात बुधवारी (31 ऑगस्ट) व गुरुवारी (ता. एक) सायंकाळी पाचच्या सुमारास जोरदार पाऊस पडला. दरम्यान, यामुळे एमआयडीसीतुन वाहणाऱ्या ओढ्याला चांगलेच पाणी वाहिले. या पुराच्या पाण्यासोबत कंपन्यांचे केमिकल्स युक्त लाल पाणी सुद्धा मोठ्या प्रमाणात वाहिले. शनिवारी (ता. तीन) तर पावसाचा अगदी थोडा शिडकावा झाला. मात्र, ओढ्याला फूट भर लाल पाणी वाहत असल्याने हा चर्चेचा विषय ठरला. जालना महामार्गावरील पुलाखालुन वाहणारा हा लाल पाण्याचा पूर पाहण्यासाठी मोठी गर्दी झाली होती. पादचाऱ्यांसह वाहनधारक वाहन थांबवून वाहणारे लाल पाणी बघत आश्चर्य व्यक्त करीत होते. दरम्यान, यामुळे कुंभेफळ ग्रामस्थांत पुन्हा भितीचे वातावरण निर्माण झाले आहे.

एमआयडीसीचे वरिष्ठ अधिकारी व प्रदूषण नियंत्रण महामंडळाने या गंभीर बाबींची त्वरीत दखल घेण्याचे आवाहन करण्यात येत आहे.