छत्रपती संभाजीनगर : रिक्षाचालकाला ‘चार दिवसांपूर्वी माझ्या वहिणीला लवकर जायचे होते, तर तु विमानाने घेऊन जाऊ का? असे का बोलला असे म्हणत चौघांनी रिक्षाचालकाला धावता रिक्षा थांबवून बेदम मारहाण केली.

ही घटना २१ जून रोजी मोंढा उड्डाणपुलाखाली घडली. याप्रकरणी रिक्षाचालक अशोक भाऊसाहेब ढाकणे (३२, रा. भानुदासनगर, जवाहर कॉलनी) यांनी दिलेल्या फिर्यादीवरुन मारहाण करणाऱ्या चौघांविरोधात क्रांती चौक पोलिस ठाण्यात गुन्हा दाखल करण्यात आला आहे.

फिर्यादीनुसार अशोक हे रिक्षाचालक आहेत. ते रिक्षात प्रवाशी बसवून मोंढा नाका परिसरातून जात असताना चौघांनी रिक्षा अडवित आणि चार दिवसांपूर्वी बोललेल्या कारणावरुन अशोक यांना कुत्र्याच्या गळ्यातील साखळीने मारहाण केली,

दरम्यान रिक्षातील प्रवाशांनाही मारहाण केली, यात प्रवाशाचे डोके फुटले. याप्रकरणी दाखल गुन्ह्याचा तपास हवालदार मेघना कुलकर्णी या करत आहेत.

जून्या भांडणातून कटरने वार

जून्या भांडणातून व्यापारी तरुणावर दोघांनी कटरने वार करुन चामड्याच्या पट्ट्याने मारहाण केली. ही घटना २१ जून रोजी रात्री साडेआठ वाजेदरम्यान पवननगर, रांजणगाव येथे घडली.

याप्रकरणी रोहण तारूकर (१९) याने दिलेल्या फिर्यादीनुसार जून्या भांडणातून त्याला फैजान खान जावेद खान (२०) आणि अमोल कुबेर (२१, रा. दोघेही रांजणगाव) या दोघांनी रोहन याच्या ओठावर कटरने मारुन चामड्याच्या पट्ट्याने मारहाण करत शिवीगाळ केली. तसेच ठार मारण्याची धमकी दिली. याप्रकरणी दोघांविरोधात एमआयडीसी पोलिस ठाण्यात गुन्हा दाखल झाला असून अधिक तपास उपनिरीक्षक अधाने करत आहेत.