छत्रपती संभाजीनगर : स्मार्ट सिटी अभियानाअंतर्गत मिटमिटा भागात शंभर एकरावर सफारी पार्क विकसित केले जात आहे. हे काम वर्षभरात पूर्ण होणार असून, महापालिकेचे सिद्धार्थ उद्यानातील प्राणिसंग्रहालय याठिकाणी हलविले जाणार आहे. नव्या प्राणिसंग्रहालयात सिंह आणण्यासाठी महापालिका प्रशासनाने तयारी सुरू केली आहे.

महापालिकेच्या सिद्धार्थ उद्यान प्राणिसंग्रहालय प्राण्यांसाठी असलेली अपुरी जागा, चुकीच्या पद्धतीने मांडण्यात आलेले पिंजरे यामुळे वादात सापडले होते. या कारणांमुळे केंद्रीय प्राणिसंग्रहालय प्राधिकरणाने महापालिकेच्या प्राणिसंग्रहालयाची परवानगी रद्द केली होती.

त्यानंतर हे प्राणिसंग्रहालय लवकरच मिटमिटा भागात स्थलांतरित करण्यात येईल, अशी ग्वाही महापालिकेने दिली. त्यानुसार नव्याने परवानगी देण्यात आली. दरम्यान स्मार्ट सिटीच्या माध्यमातून सुमारे पावणेदोनशे कोटी रुपये खर्च करून मिटमिटा भागात १०० एकरावर प्राणिसंग्रहालयउ

भारले जात आहे. या कामाची डिसेंबरअखेरची मुदत आहे. या मुदतीत काम पूर्ण झाल्यास पुढील वर्षी महापालिकेचे प्राणिसंग्रहालय मिटमिटा भागात जाईल. त्यामुळे पर्यटकांना आकर्षित करण्यासाठी नवे प्राणी आणले जाणार आहेत. त्यासाठी प्राणिसंग्रहालयाच्या अधिकाऱ्यांनी आतापासूनच तयारी सुरू केली आहे. गुजरातमधील जुनागढ प्राणिसंग्रहालयात मोठ्या संख्येने सिंह आहेत. त्यामुळे महापालिकेला जुनागढ येथून सिंह मिळू शकतात, असे अधिकाऱ्यांचे म्हणणे आहे.

१२ वर्षापूर्वी होते सिंह

महापालिकेच्या प्राणिसंग्रहालयात तीन सिंह होते. त्यातील एक नर व दोन मादी होत्या. पण त्यांचे प्रजनन करण्यास प्राणिसंग्रहालयाला परवानगी नव्हती. दरम्यान वयोवृद्ध झालेले हे तीनही सिंह मृत्यूमुखी पडले. आता नव्या प्राणिसंग्रहालयात छत्रपती संभाजीनगरकरांना सिंहाचे दर्शन होऊ शकते.

प्राण्यांची संख्या दुपटीने वाढणार

प्राणिसंग्रहालयात सध्या पिवळे वाघ-९, पांढरे वाघ-३, बिबटे-२, कोल्हे-२, नीलगाय-४, सांबर-४६, काळवीट-५१, चितळ-६, मगर-४, माकड-५, उदबिल्ला-१, इमू-१, मोर-३, पानपक्षी-१९, चांदणी कासव-४१, साप-९९ या प्रमाणे प्राणी आहेत. प्राणिसंग्रहालय मिटमिटा भागात स्थलांतरित झाल्यानंतर प्राण्यांसाठीची जागा वाढणार आहे. त्यामुळे प्राण्यांची संख्या दुपटीने वाढणार असल्याचे सूत्रांनी सांगितले.