छत्रपती संभाजीनगर - शहराच्या पाणी पुरवठ्यावरील संकटांची मालिका सुरूच असून, बुधवारी (ता. १३) सायंकाळी जायकवाडी येथील पंपहाऊसच्या वीज उपक्रेंद्रात स्पार्किंग होऊन दोन्हीही योजना बंद पडल्या. नेमके याचवेळी नक्षत्रवाडीजवळ १२०० मिलिमीटर व्यासाची मुख्य जलवाहिनीही फुटली.

त्यामुळे पाणी पुरवठ्याचे वेळापत्रक पुन्हा एक दिवसाने पुढे ढकलण्यात आले आहे. ऐन सणासुदीत पाणीपुरवठ्याचे वेळापत्रक कोलमडल्याने नागरिक संतप्त झाले आहेत. महापालिकेची संपूर्ण यंत्रणा सध्या मंत्रिमंडळ बैठकीच्या तयारीच्या अनुषंगाने व्यस्त असल्याने पाणी पुरवठ्याकडे मात्र दुर्लक्ष होत आहे.

शहराचा पाणी पुरवठा विविध कारणांमुळे वारंवार खंडित होत आहे. कधी वीज पुरवठा खंडित होतो तर कधी पाइपलाइन फुटते. त्यामुळे शहरातील वेळापत्र कोलमडले आहे. अनेक भागांना सहा ते सात दिवसाआड पाणी दिले जात आहे. महापालिकेच्या पाणी पुरवठा योजनेसाठी जायकवाडी धरणाच्या परिसरात पंपहाऊस उभारण्यात आले आहे. या पंपहाऊसला चोवीस तास वीज पुरवठा व्हावा यासाठी वीजेचे उपकेंद्र आहे. एक्स्प्रेस फिडरही देण्यात आले आहे.

असे असताना गेल्या दोन महिन्यांपासून वारंवार वीज पुरवठा खंडित होत आहे. बुधवारी सायंकाळी ४.५५ वाजता पंपहाऊसच्या परिसरातील वीज उपकेंद्रात स्पार्किंग झाले आणि दोन्हीही योजना पूर्णपणे बंद पडल्या. याचवेळी दुपारी चार वाजेच्या सुमारास नक्षत्रवाडी येथे १२०० मिलिमीटर व्यासाची जलवाहिनी फुटली.

श्रीहरी असोसिएट्सच्या माध्यमातून नक्षत्रवाडी जवळ ९०० मिलिमीटर व्यासाची जलवाहिनी टाकली जात आहे. त्यावेळी जेसीबी मशिनचा धक्का लागून १२०० मिलिमीटर व्यासाच्या जलवाहिनीचा एअर व्हॉल्व्ह फुटला आणि हजारो लिटर पाणी वाया गेले, असे महापालिकेतर्फे सांगण्यात आले.

वेळापत्रक ढकलले पुढे

दरम्यान, जलवाहिनीतील पाणी काढल्यानंतर दुरुस्तीचे काम सुरु केले जाईल असे अधिकाऱ्यांनी सांगितले असून, या दुरुस्तीच्या कामासाठी काही वेळ लागण्याची शक्यता असल्याने शहरास होणाऱ्या पाणी पुरवठ्याचे वेळापत्रक एक दिवसाने पुढे ढकलले जाईल असे स्पष्ट करण्यात आले आहे.