छत्रपती संभाजीनगर : मध्यवर्ती बसस्थानकातून छत्रपती संभाजीनगर ते सिल्लोड या मार्गावर पहिल्यांदाच महिला चालक रमा रमेश गायकवाड यांनी गुरुवारी (ता. १५) एसटी महामंडळाची लालपरी अत्यंत सफाईदारपणे चालविली.

छत्रपती संभाजीनगर विभागात रमा गायकवाड यांना पहिल्या महिला बसचालक झाल्याचा बहुमान मिळाला. बसचालक रमा गायकवाड यांनी छत्रपती संभाजीनगर ते सिल्लोड या मार्गावर बस चालवून प्रवाशांना सुरक्षित प्रवास घडवला. एसटी महामंडळात नुकतीच महिला चालक कम वाहकांची नियुक्ती झालेली आहे. खडतर प्रशिक्षण घेऊन या महिला चालकांनी महामंडळाच्या बसचे स्टिअरिंग हाती घेतले आहे.

गुरुवारी सकाळी साडेअकरा वाजता मध्यवर्ती बसस्थानकातून बसने (एमएच-२०-बीएल-२५६५) रमा रमेश गायकवाड (वय-३३) यांनी छत्रपती संभाजीनगर ते सिल्लोड या मार्गावर प्रवासी नेले आणि सिल्लोडहून येणाऱ्या प्रवाशांना शहरात आणले. त्यांच्या बसच्या वाहक श्रीमती आर. आर. खेडकर या महिलाच होत्या हे विशेष होय. त्या छत्रपती संभाजीनगरच्या पहिल्या एसटी बसचालक ठरल्या आहेत.

एसटी महामंडळात २०६ महिला चालक कम वाहकांची नुकतीच नियुक्ती झालेली आहे. छत्रपती संभाजीनगर विभागात पाच चालक कम वाहक महिला रुजू झालेल्या आहेत. सिल्लोड मार्गावर एसटी बस सफाईदारपणे चालवणाऱ्या रमा गायकवाड यांनी कुठल्याही प्रकारचा संकोच न करता अत्यंत सफाईदारपणे बस चालवली. मध्यवर्ती बसस्थानकाचे वरिष्ठ आगार व्यवस्थापक अविनाश साखरे, बसस्थानक प्रमुख संतोष नजन, कनिष्ठ आगार व्यवस्थापक लक्ष्मणराव लोखंडे यांच्या प्रोत्साहनामुळे हे शक्य झाले.