छत्रपती संभाजीनगर - मोटार अपघातात जखमी झालेल्या व्यक्तीला न्यायालयाच्या इमारतीत येणे शक्य नव्हते. त्यामुळे लोकअदालतमधील नुकसानभरपाईचा दावा तडजोड करण्यासाठी जिल्हा न्यायाधीश ए. आर. उबाळे हे स्वतः पार्किंगमध्ये पोचले. त्यानंतर दहा लाखांचा दावा साडेसात लाखांमध्ये तडजोड करण्यात आला.

जिल्हा न्यायालयाच्या इमारतीत शनिवारी (ता. नऊ) राष्ट्रीय लोकअदालत असल्याने जखमी अर्जदार गोरखनाथ पांडुरंग घुगे यांचे मोटारअपघात नुकसानभरपाईचे प्रकरण तडजोडीसाठी ठेवण्यात आले होते. जखमी घुगे यांनी ॲड. के. एस. तांदुळजे यांच्यामार्फत १० लाख रुपये नुकसानभरपाईचा दावा दाखल केला होता. युनायटेड इंडिया इन्शुरन्स कंपनी आणि जखमी अर्जदार श्री. घुगे यांच्यात साडेसात लाख रुपयांमध्ये समझोता झाला.

जखमी श्री. घुगेंना अपघातात ४२ टक्के कायमस्वरूपी अपंग आल्याने त्यांना चालता येत नसल्याने ते कारमध्येच थांबले होते. ही बाब लक्षात आल्यानंतर अर्जदार प्रत्यक्ष समोर आवश्यक असल्याने जिल्हा न्यायाधीश ए. आर. उबाळे हे स्वतः तडजोड घडवण्यासाठी पार्किंगमध्ये आले. त्यानंतर ही तडजोड करण्यात आली.

यावेळी विधी सेवा प्रधिकरणाचे सचिव श्रीमती वै. प्र. फडणवीस, जिल्हा वकील संघाचे अध्यक्ष सतीश मुंदवाडकर, सचिव ॲड. सदानंद सोनवणे, अर्जदारांचे वकील ॲड. के. एस. तांदुळजे, विमा कंपनीचे वकील ॲड. के. ए बनकर, ॲड.अनिरुद्ध उस्मानपूरकर तसेच इन्शुरन्स कंपनीच्या विधी अधिकारी रसिका सरदार व ॲड.मधुकर आहेर यांची उपस्थिती होती.