छत्रपती संभाजीनगर : शासनाने शहराला पाणी पुरवठा करणाऱ्या जुन्या पाणी पुरवठा योजनेचे बळकटीकरण करण्यासाठी १९३ कोटी रुपयांचा निधी मंजूर केला आहे. त्यानुसार महाराष्ट्र जीवन प्राधिकरणामार्फत निविदा प्रक्रिया राबविली जात आहे. यातील नवीन जलशुद्धीकरण केंद्र बांधण्याच्या कामासाठी प्रतिसाद मिळत नसल्याने आता सातव्यांदा निविदा प्रसिद्ध करण्यात आली आहे.

शहरासाठी नव्या पाणी पुरवठा योजनेचे काम सुरू असले तरी ही योजना पूर्ण होईपर्यंत नागरिकांना दिलासा मिळावा यासाठी जुन्या ७०० मिलिमीटर व्यासाच्या पाणी पुरवठा योजनेचे बळकटीकरण करण्याचा निर्णय घेण्यात आला आहे. त्यासाठी १९३ कोटींचा निधी मंजूर करण्यात आला आहे. केंद्र शासनाच्या अमृत-२.० योजनेतून यासाठी निधी मिळणार आहे.

बळकटीकरणाचे काम करताना ७०० मिलिमीटर व्यासाची जलवाहिनी बदलून ९०० मिलिमीटर व्यासाची जलवाहिनी टाकण्यात येणार आहे. त्याशिवाय फारोळा येथील जुन्या जलशुद्धीकरण केंद्राच्या दुरुस्तीचे काम करण्यात येणार आहे. फारोळा येथेच नवीन जलशुद्धीकरण केंद्र बांधले जाणार आहे.

नक्षत्रवाडीच्या डोंगरावर संतुलित जलकुंभाचे (एमबीआर) बांधकाम केले जाणार आहे. यातील जलवाहिनीच्या कामांच्या निवेदाला प्रतिसाद मिळाला आहे, पण जलशुद्धीकरण केंद्र आणि एमपीआरच्या कामासाठी काढलेल्या निविदेला प्रतिसाद मिळालेला नाही. या कामासाठी सहावेळा निविदा काढण्यात आली, त्याला प्रतिसाद न मिळाल्यामुळे सातव्यांदा निविदा काढण्यात आल्याची माहिती प्राधिकरणाच्या वरिष्ठ अधिकाऱ्यांनी दिली.