सिल्लोड : पाण्यासारखे पुण्य नाही, पाणी वाटपासारखा धर्म नाही. या उक्तीप्रमाणे मागील चाळीस वर्षांपासून अविरतपणे सिल्लोड येथील बसस्थानकावर पाणपोईद्वारे प्रवाशांना मोफत पाणी देण्याचे काम १०२ वर्षांचे हाजी शेख रुस्तुम आजही आनंदाने करीत आहे. त्यांच्या कार्याचे कौतुक होत आहे.

चाळीस वर्षांपासून कोणत्याही नागरिकांना काहीही न मागता पाणी वाटपाचे काम ते करतात. देईल ते घ्यायचे नाहीतर पाणी वाटपाचे काम करीत रहायचे हा त्यांचा नित्यक्रम आहे. समाजाचे आपण काही देणे लागतो या भावनेतून बसस्थानकावर उन्हाळ्यातील चार महिने शहरातील व्यापारी परिवाराच्या वतीने पाणपोई चालविण्यात येते. या कार्यासाठी त्यांनी चाळीस वर्षांपासून शेख रूस्तम यांच्या हाती पाण्याचा पेला दिला.

त्यांच्याकडून जो मोबदला मिळेल त्याची वाच्यता कोठेही होत नाही. पाणपोईची व्यवस्था करणारे, तटस्थ उभे राहत पाणी पाजणारे आणि याठिकाणी पाण्याचा पुरवठा करणारे हे सर्व हा नित्यनेम काटेकोरपणे पाळत आहे. यासाठी एसटी आगार प्रशासनाचे मोलाचे सहकार्य नेहमीच मिळत आहे.

शहरातील माधवदास कटारिया यांनी चाळीस वर्षांपूर्वी पाणपोई उपक्रमाची बसस्थानकावर सुरूवात केली. त्यांच्या दुसऱ्या पिढीने देखिल हा उपक्रम गाजावाजा न करिता सुरू ठेवला आहे. याठिकाणी नाममात्र शुल्कामध्ये शहरातील शेख अकिल बडेमिया हे टॅंकरद्वारे पाण्याचा पुरवठा नियमित करतात.

शहरातील ईदगाह रस्त्यावरील परिसरात राहणारे हाजी शेख रूस्तम वयाच्या साठ वर्षांपासून हे काम करतात. वयाच्या १०२ व्या वर्षी देखिल त्यांची हे सेवा सुरूच आहे. महाशिवरात्रीपासून जून महिन्यापर्यंत उन्हाळ्यामध्ये पाणी वाटपाचे काम चार महिने सुरू राहते. बसस्थानकावरील पाणपोई व हाजी शेख रूस्तम हे समीकरणच बनले आहे.