औरंगाबाद : एकनाथ शिंदे (Eknath Shinde) यांनी शिवसेनेत बंडखोरी केल्यामुळं शिंदे गट विरुध्द उध्दव ठाकरे गट असा 'सामना' रंगताना पहायला मिळतोय. एकमेकांविरुध्द आरोप-प्रत्यारोपांच्या फैरी झडत आहेत. याच पार्श्वभूमीवर पोलीस आयुक्तालयाच्या वतीनं गणोशोत्सवपूर्वी (Ganeshotsav) प्रथेप्रमाणं आयोजित समन्वय बैठकीत राजकीय नेत्यांच्या मानपमानाचं नाट्यही पाहायला मिळालं.

शिवसेनेचे ज्येष्ठ नेते आणि माजी खासदार चंद्रकांत खैरे (Chandrakant Khaire) यांचा अगोदर सत्कार करण्यात आला. यावेळी मंचावर उपस्थित असलेले शिंदे गटातील आमदार संजय शिरसाट (Sanjay Shirsat) चिडले आणि हे प्रोटोकॉलनुसार चुकीचं असल्याचं म्हणत खुर्चीवरून उठत कार्यक्रम सोडून शिरसाट निघाले होते. दरम्यान, बाजूलाच बसलेल्या एमआयएम पक्षाचे खासदार इम्तियाज जलील (Imtiaz Jaleel) यांनी त्यांचा हात धरून रोखलं आणि त्यानंतर शिरसाट यांचा सत्कार करण्यात आला.

खैरे साहाब.. सिनियर है ना, क्या हुआ?

खैरे यांचं नाव आधी घेतल्यानं शिरसाट यांचा पारा चढला होता. मात्र, इतर नेत्यांनी पुढाकार घेऊन त्यांना बसण्याची विनंती केली. त्यामुळं शिरसाट यांचा राग काही प्रमाणात कमी झाला. मात्र, याचवेळी समोर बसलेल्यांमध्ये एकानं, खैरे साहाब.. सिनियर है ना, क्या हुआ, अशी टिप्पणी केली. त्यावर शिंदे गटाचे जिल्हाप्रमुख राजेंद्र जंजाळ यांनी सिनियर होंगे तो घर पे लेके जाओ, अशी खोचक टिप्पणी केली आणि सभागृहात एकच हशा पिकला. दरम्यान, पोलीस आयुक्तालयाच्या वतीनं आयोजित कार्यक्रमात झालेल्या नेत्यांच्या रुसवे-फुगव्याची जोरदार चर्चा शहरात सुरुय.