औरंगाबाद : निवडणूक आयोगानं (Election Commission) शिवसेनेचं धनुष्यबाण हे चिन्ह (Shiv Sena) गोठवलं आहे. आता ठाकरे गट (Thackeray Group) किंवा शिंदे गटाला (Shinde Group) हे चिन्ह वापरता येणार नाहीय. अंधेरी पोटनिवडणूक आता धनुष्यबाण चिन्हावर लढवता येणार नाही. अंधेरी पोटनिवडणुकीपूरता हा निर्णय असेल.

महत्त्वाचं म्हणजे, शिवसेना पक्षाचं नाव देखील दोन्ही गटांना वापरता येणार नाही. नव्या चिन्हासाठी सोमवारी दुपारी एक वाजेपर्यंत दोन्ही गटांना आयोगाला पर्याय द्यावं लागणार असल्याची माहिती आहे. निवडणूक आयोगाच्या या निर्णयानंतर दोन्ही गटांत जोरदार वाद सुरुय. दरम्यान, शिवसेनेचे नेते चंद्रकांत खैरे (Chandrakant Khaire) यांनी एका वृत्त वाहिनीशी बोलताना शिंदे गटाबाबत वादग्रस्त विधान केल्याचा आरोप शिंदे गटाकडून करण्यात आलाय.

शिंदे गटाकडून खैरेंवर गुन्हा दाखल करण्याची मागणी

यामुळं खैरे यांच्यावर गुन्हा दाखल करण्याची मागणी शिंदे गटाकडून करण्यात आलीय. यासाठी पोलिसांत तक्रार सुद्धा दाखल करण्यात आली आहे. निवडणूक आयोगानं धनुष्यबाण गोठवण्याचा निकाल दिल्यानंतर दोन्ही गटातील नेत्यांकडून एकमेकांविरुध्द आरोप-प्रत्यारोप सुरुय. याच पार्श्वभूमीवर प्रतिक्रिया देताना खैरेंनी मुख्यमंत्री एकनाथ शिंदेंवर (Eknath Shinde) जोरदार टीका केली.

'..तर आनंद दिघेंनी एकनाथ शिंदेंना उलटं लटकवलं असतं'

आज आनंद दिघे असते तर त्यांनी एकनाथ शिंदे यांना उलटं लटकवलं असते, असं खैरे म्हणाले होते. त्यांच्या याच विधानावरून आता शिंदे गटानं आक्रमक भूमिका घेतली असून खैरेंवर गुन्हा दाखल करण्याची मागणी शिंदे गटाकडून करण्यात आलीय. याप्रकरणी औरंगाबादमधील शिंदे गटाच्या पदाधिकाऱ्यांनी पोलीस (Aurangabad Police) आयुक्त कार्यालयात धाव घेत, चंद्रकांत खैरेंवर गुन्हा दाखल करण्याची मागणी केलीय. एकनाथ शिंदे राज्याचे मुख्यमंत्री असून, त्यांच्याबद्दल खैरे यांनी केलेलं विधान चुकीचं असल्याचं शिंदे गटाचे जिल्हाप्रमुख राजेंद्र जंजाळ यांनी म्हटलंय.