चित्तेपिंपळगाव (जि. औरंगाबाद)  : कोरोनाची साखळी तुटावी, यासाठी शासनाने थेट शेतकऱ्‍यांच्या बांधावर खत पोचविण्याची योजना सुरू केली. पण, ही योजना कागदावरच असून, येथील सर्वच कृषी सेवा केंद्रावर एकाच वेळी शेकडोंच्या संख्येने शेतकऱ्यांची युरिया खतासाठी गर्दी करीत आहेत. त्यामुळे दुकानांसमोर रांगा दिसत आहेत. मंगळवारी (ता. सात) तर
पोलिस बंदोबस्तात विक्रेत्यांना खत विकावे लागले. 

सध्या शेतकऱ्यांसमोर खत टंचाईचे संकट आहे. त्यामुळे कोरोनाच्या काळातही शेतकरी घराबाहेर पडून खत खरेदीसाठी जात आहेत. पण, कृषी केंद्रात गर्दी होत असल्याने सुरक्षित अंतराचा नियम पाळला जात नसल्याचे चित्र आहे. सद्यःस्थितीत पाऊस चांगला पडत असल्याने पीक बहरात आहे. मात्र, आता त्यासाठी पोषक असणारे युरिया खतच भेटत नसल्याने शेतकरी मोठ्या अडचणीत सापडला आहे.

पाकिस्तानच्या मंत्रिमंडळात शिरला कोरोना; काल परराष्ट्रमंत्री तर आज खुद्द...

सध्या पिकाच्या वाढीसाठी रासायनिक खत टाकणे आवश्यक आहे. अशात युरिया टंचाई निर्माण झाल्याने या पिकांना खताची मात्रा देण्याला उशीर होत आहे. शासनाची बांधावर खत ही योजना कागदावर असल्याचे चित्र आहे आहे. येथील कृषी सेवा केंद्र उघडण्यापूर्वीच शेतकरी सकाळी-सकाळी येऊन रांगा लावत आहेत. दरम्यान, पोलिस बंदोबस्तात शेतकऱ्यांना खाताची विक्री केली जात आहे. 

...म्हणून आम्ही गलवान खोऱ्यातून माघार घेतोय; चीनने दिली कबुली
  
उपाशी पोटी चक्करा 
खत मिळावे, यासाठी अनेक शेतकरी रोज उपाशी पोटी चक्करा टाकत आहेत. त्यातच कोरोनाचीही भीती आहे. पण, टंचाई असल्याने अनेकांना खताविना रिकाम्या हाताने परतावे लागत आहे. 
 
‘सकाळ’च्या व्हिडिओची दखल 
युरियाची टंचाई निर्माण झाल्याचा व्हिडिओ ‘सकाळ’च्या फेसबूक पेजवर प्रसारित करण्यात आला होता. या व्हिडिओची दखल घेत तालुका कृषी अधिकारी सुदर्शन मामडेवार यांनी तत्काळ चाळीस टन युरियाचा साठा येथील संतोष कृषी सेवा केंद्रावर उपलब्ध करून दिला. मात्र, मागणीच्या तुलनेत तो कमी आहे.