औरंगाबाद: रमजानचा महिना (Ramadan) हा ‘बरकतों का’ महिना असल्याने महिनाभर कुराण शरीफच्या पठणाला अतिशय महत्त्व असते. तसेच विशेष नमाज तरावीहमध्ये संपूर्ण कुराणाचे पठण केले जाते. प्रत्येक मुस्लिम कुटुंबात कुराण शरीफच्या प्रती हमखास असतातच. अशीच अतिशय दुर्मिळ आणि फक्त एक इंचाची कुराण शरीफची (quran sharif) प्रत शहरातील अब्दुल हादी यांच्याकडे आहे. हे कुराण वाचण्यासाठी चक्क भिंगाचा वापर करावा लागतो. ही कुराण शरीफची प्रत दीडशे ते दोनशे वर्षे जुनी आहे. तसेच त्यांच्याकडे आणखी पाच इंचाचे २०० वर्षांपेक्षा जास्त आणि एक ११७ वर्षे जुने कुराण शरीफ संग्रही आहे.

पिढ्यान् पिढ्या कुराण शरीफचे जतन-

कुराण शरीफचा संदेश जगातील सर्वांसाठी आहे. पाचवेळची नमाज तसेच विशेष नमाज तरावीहमध्ये कुराण शरीफचे पठण केले जाते. मात्र यावर्षी लॉकडाउनमुळे पाचवेळची नमाज घरातच अदा करावी लागत आहे. अब्दुल हादी यांच्याकडील फक्त १ इंचाचे कुराण शरीफ अतिशय दुर्मिळ आहे. अब्दुल हादी यांचे वडील अब्दुल हई यांनी ही प्रत जपून ठेवली. अब्दुल हई यांना ही प्रत त्यांच्या वडिलांकडून मिळाली होती.

इजिप्तमधील २०० वर्षांपेक्षा जास्त जुने कुराण शरीफ-

अब्दुल हादी यांच्याकडे इजिप्तमधील दोनशे वर्षे जुनी कुराण शरीफचीही प्रत आहे. हे कुराण शरीफ फक्त पाच इंचाचे आहे. यावर हे कुराण शरीफ इजिप्तमधील असल्याचा उल्लेख आहे. यामध्ये किताबत पद्धतीने कुराण शरीफमधील आयात आहेत.

११७ वर्षे जुने कुराण शरीफ-

मौलवी हाफीज नजीर अहेमद यांनी १९०३ मध्ये उर्दूतून कुराण शरीफची भाषांतर केलेली प्रत आहे. एका पानावर मूळ कुराण शरीफच्या अरबीतील आयात आहे तर बाजूच्या पानावर त्याची उर्दूतून माहिती देण्यात आलेली आहे. हे कुराण शरीफसुद्धा अतिशय दुर्मिळ आहे.

माझे वडील अब्दुल हई यांच्याकडील ही दुर्मिळ पुस्तके आहेत. त्यांच्या निधनानंतर मी सांभाळली. अनेक जण आमच्या सेंटरमधील दुर्मिळ पुस्तके संदर्भासाठी वापरतात. आमच्याकडील कुराण शरीफच्या प्रती आम्ही पिढ्यान् पिढ्या जपून ठेवल्या आहेत.

-अब्दुल हादी, संचालक, अब्दुल हई रिसर्च सेंटर