औरंगाबाद : समृद्धी महामार्गाच्या उद्‍घाटनानंतर प्रवाशांना जलद सेवा देण्यासाठी नागपूर ते शिर्डी ही बससेवा गुरुवार (ता. १५) पासून सुरु होत आहे. त्याचप्रमाणे औरंगाबाद विभागातर्फे औरंगाबाद-नागपूर ही शयनयान बससेवा सुरु करण्यात येत आहे. प्रवाशांना जलद व आरामदायी प्रवासाची सुविधा उपलब्ध करून देणेसाठी एसटी महामंडळाकडून नागपूर ते शिर्डी या मार्गावर शयनयान-आसनी बससेवा सुरू करण्यात येत आहे. या बसमध्ये प्रवाशांना २ बाय १ पध्दतीची ३० आसने (पुशबॅक सिट) उपलब्ध असून त्यात १५ शयन आसने (स्लिपर) आहेत. सदरची बससेवा ही नागपूर व शिर्डी या दोन्ही ठिकाणाहून दररोज रात्री ०९.०० वाजता सुटेल व पहाटे ०५.३० वाजता पोचेल.

सदरच्या बससेवेमुळे प्रवाशांच्या सध्याच्या प्रवास अंतरात १०२.५ कि.मी. व वेळेमध्ये ४.१५ तासांची बचत होणार आहे. या बससेवेसाठी प्रति प्रौढ व्यक्ति १३०० रुपये व मुलांसाठी ६७० रुपये इतके प्रवासभाडे आकारणी करण्यात येणार आहे. तसेच ७५ वर्षावरील ज्येष्ठांना तिकिट दरात पूर्ण मोफत तर ६५ ते ७५ दरम्यानच्या ज्येष्ठांना पन्नास टक्के सवलत आहे.

औरंगाबाद-नागपूर सेवा
नागपूर ते औरंगाबाद (मार्गे जालना) या मार्गावरही समृध्दी महामार्गाव्दारे शयन आसनी बससेवा सुरू करण्यात येत आहे. सदरची बस ही नागपूर व औरंगाबाद या दोन्ही ठिकाणाहून दररोज रात्री १०.०० वाजता सुटेल व जालनामार्गे पहाटे ०५.३० वाजता पोचेल. सदर बससेवेमुळे प्रवाशांच्या प्रवास अंतरात ५०.९ कि.मी. व प्रवास वेळेमध्ये ४.४० तासांची बचत होणार आहे. सदर बससेवेमुळे नागपूर ते औरंगाबाद या प्रवासासाठी प्रति व्यक्ति ११०० रुपये व मुलांसाठी ५७५ रुपये इतके प्रवासभाडे आहे. तर नागपूर ते जालना या प्रवासासाठी प्रति व्यक्ति ९४५ रुपये व मुलांसाठी ५०५ रुपये इतके प्रवासभाडे आहे. प्रवाशांनी या सुविधेचा जास्तीत जास्त लाभ घ्यावा असे आवाहन एसटी महामंडळाने केले.