फुलंब्री : फुलंब्री तहसील कार्यालयात मद्यधुंद अवस्थेत येऊन महिला कर्मचाऱ्याला शिवीगाळ करून धमकी देणाऱ्या व्यक्तीवर कडक कारवाई करण्यात यावी, या मागणीसाठी शुक्रवारी (ता.५) तालुका महसूल कर्मचारी संघटनेने कामकाज बंद ठेऊन निदर्शने केली.

फुलंब्री तहसील कार्यालयात मद्यधुंद अवस्थेत समाधान तायडे या व्यक्तीने महिला कर्मचारी योगिता पाटील यांना शिवीगाळ केली. याप्रकरणी कर्मचारी समजून सांगण्यासाठी गेले असता सदरील व्यक्तीने व त्याच्या पत्नीने अव्वल इतर कर्मचाऱ्यांनाही दमदाटी केली तसेच तुम्हाला पाहून घेऊ अशी धमकी देत शासकीय कामात अडथळा निर्माण केला. यानंतर पोलिसांना कळविण्यात आले.

त्यानंतर पोलिस ठाण्यात याप्रकरणी गुन्हा दाखल करण्यात आला आहे. या घटनेच्या निषेध म्हणून शुक्रवारी तालुका महसूल कर्मचारी संघटनेने दिवसभर काम बंद आंदोलन करून तालुका महसूल कर्मचारी संघटनेने तहसीलदार डॉ.कृष्णा कानगुले यांना निवेदन दिले.