औरंगाबाद : ‘सारथी’अंतर्गत विद्यार्थ्यांचे रखडलेले पैसे येत्या १५ दिवसांत विद्यार्थ्यांच्या खात्यावर टाकल्या जातील, अशी घोषणा बहुजन कल्याण विभागाचे मंत्री विजय वडेट्टीवार यांनी (ता.३) विधान परिषदेत केली. मराठवाडा पदवीधर मतदारसंघाचे आमदार सतीश चव्हाण यांनी लक्षवेधीव्दारे ‘सारथी’ अंतर्गत विद्यार्थ्यांच्या रखडलेल्या प्रश्नांला वाचा फोडून सभागृहाचे लक्ष वेधले.

हेही वाचा : मराठा तरुणांचे पंख छाटण्याचे प्रयत्न ; सारथी संस्थेला मदत बंद

मराठा कुणबी समाजातील विद्यार्थ्यांच्या शैक्षणिक विकासासाठी छत्रपती शाहू महाराज संशोधन, प्रशिक्षण व मानव विकास संस्था (सारथी), पुणे या संस्थेची स्थापना करण्यात आली. मात्र सारथीच्या आर्थिक व्यवहारात अनियमितता झाली असल्याने संस्थेचे कामकाज ठप्प झाले आहे. परिणामी याचा फटका विद्यार्थ्यांना बसत असून शेकडो विद्यार्थ्यांना त्यांचे हक्काचे मानधन मिळाले नसल्याचे आमदार श्री. चव्हाण यांनी सभागृहाच्या निदर्शनास आणून दिले. 

यातील सर्वाधिक विद्यार्थी हे मराठवाड्यातील असून या विद्यार्थ्यांना तात्काळ मानधन द्यावे, अशी आग्रही मागणी त्यांनी सभागृहात केली. तसेच तारादूतांचे देखील मागील दोन महिन्यांपासून मानधन मिळाले नसल्याचे सांगितले. त्यामुळे या विद्यार्थ्यांना वेळेवर मानधन मिळावे, यासाठी भरीव अशी आर्थिक तरतूद करावी, अशी मागणी देखिल सभागृहात केली. 

हेही वाचा : औरंगाबाद ते मनमाड 
विद्युतीकरण होणार : पण केंव्हा ते वाचा 

आमदार चव्हाण यांच्या प्रश्नाला उत्तर देतांना बहुजन कल्याण विभागाचे मंत्री श्री. वडेट्टीवार म्हणाले, सारथीच्या आर्थिक गैरव्यवहारासंदर्भात शासनाने चौकशी समिती नेमली असून येत्या १० दिवसात यासंदर्भात चौकशी पूर्ण करून दोषी अधिकाऱ्यांवर कडक कार्यवाही केली जाईल. 

सारथीसाठी निधीची कुठल्याही प्रकारची कमतरता पडू देणार नसून यासाठी भरीव अशी तरतूद केली जाईल. सारथीची स्वायत्ता अबाधित ठेवली जाईल. तसेच एकाही मराठा विद्यार्थ्यांचे नुकसान होणार नाही, अशी ग्वाही श्री. वडेट्टीवार यांनी सभागृहात दिली.