औरंगाबाद : कोरोना प्रतिबंधक लसीकरणाची गती वाढविण्यासाठी लस नसेल तर पेट्रोल, गॅस, रेशन मिळणार नाही, असे आदेश जिल्हाधिकारी सुनील चव्हाण यांनी काढले आहेत. या आदेशाची अंमलबजावणी करण्यासाठी अधिकाऱ्यांचे पथके नियुक्त करण्यात आले आहेत. दरम्यान बुधवारी त्यांनी विविध ठिकाणी अचानक भेटी देऊन पाहणी केली.

काही काळ लसीकरणाची गती वाढली मात्र पुन्हा लसीकरण केंद्रावरील गर्दी कमी झाली. दरम्यान तिसरी लाट ओसरल्याने राज्य शासनाने काही जिल्हे निर्बंधमुक्त केले आहेत. त्यासाठी पहिला डोसचे ९० टक्के, दुसरा डोसचे ७० टक्के उद्दिष्ट पूर्ण होणे आवश्यक आहे. औरंगाबाद जिल्हा यात मागे असल्याने जिल्हाधिकारी श्री. चव्हाण यांनी सोमवारी (ता. आठ) मंगळवारपासून लसीकरणाची गती वाढविण्यासाठी धडक मोहीम राबविण्यात येईल, असे जाहीर केले होते.

पण मंगळवारी जिल्हाधिकाऱ्यांच्या आदेशाची अंमलबजावणी झाली नाही. त्यामुळे त्यांनी बुधवारी शहरात फेरफटका मारून जालना रस्त्यावरील पेट्रोल पंप, गॅस एजन्सींना अचानक भेट दिल्या. त्यानंतर सायंकाळी बैठक घेऊन अधिकारी-कर्मचाऱ्यांना सूचना केल्या. तसेच पेट्रोल पंपांवरील कारवाईसाठी ग्रामीणसाठी नऊ तर शहरासाठी दोन अशा ११ तहसीलदारांची नोडल अधिकारी म्हणून नियुक्ती केली. ११ नायब तहसीलदार, १६ मंडळ अधिकारी आणि १६ तलाठींचे पथक नियुक्त केले. रेशन दुकानांवर सोमवारपासून धान्य वाटप सुरू होणार आहे. त्यामुळे निर्बंधांची अंमलबजावणी सोमवारपासून होईल, असे जिल्हा पुरवठा अधिकारी अप्पासाहेब शिंदे यांनी सांगितले.