सोयगाव : मराठा समाजाला मराठा-कुणबी व कुणबी-मराठा जात प्रमाणपत्र देण्यासाठी यापूर्वी झालेल्या कुणबीच्या नोंदी कमी प्रमाणात आढळून आल्यामुळे गुरुवारपासून जिल्हाभरात शिंदे समितीचे विशेष फेरतपासणी पथके दाखल झाले असून सोयगावातही पथकाने विशेष फेरतपासण्या सुरू केल्याची माहिती तहसीलदार मोहनलाल हरणे यांनी दिली.

कुणबीच्या नोंदीच्या फेरतपासणीसाठी सोयगाव तहसील कार्यालयात हिंगोलीच्या अपर तहसीलदार सावित्री सुरे, वसमतचे मंडळ अधिकारी विनायक किनलकर, भूमी अभिलेख कार्यालयाचे शिवलिंग मुळे यांचे विशेष पथक सोयगाव तहसील कार्यालयात दाखल झाले आहे.

विशेष समितीच्या समक्ष तहसीलदार मोहनलाल हरणे यांच्या अध्यक्षतेखाली तलाठी ग्रामसेवक मंडळ अधिकारी पोलिस पाटील आदींनी सोयगावच्या अभिलेख कक्षामधील महसुली दस्तऐवज अभिलेखे तपासणी हाती घेतली आहे.

यावेळी तहसील कार्यालयाचे महसूल सहायक शरद पाटील, नायब तहसीलदार गोरखनाथ सुरे, विठ्ठल जाधव, हेमंत तायडे आदींनी अभिलेख तपासणी केली. शुक्रवार (ता.८) पर्यंत ही तपासणी सुरू राहणार आहे.