परभणी : आगामी दोन दिवसांनंतर हळूहळू जिल्ह्याच्या तापमानात एक ते दोन अंशांनी घट होणार आहे, असा अंदाज वसंतराव नाईक मराठवाडा कृषी विद्यापीठातील ग्रामीण कृषी मौसम विभागाने शनिवारी (ता. दोन) व्यक्त केला.

परभणीच्या तापमानाचा पारा सध्या ४० अंशांपुढे सरकलेला आहे. त्यामुळे जिल्हाभरात उन्हाचा कडाका वाढला आहे. गेले दोन दिवस जिल्ह्यात उष्णतेची लाट आहे. शुक्रवारी परभणीचे तापमान ४१.५ अंश सेल्सिअस इतके नोंदले गेले. त्यात शनिवारी थोडी घट दिसून आली. शनिवारी परभणीचा पारा ४०.९ अंश सेल्सिअस इतका होता. तापमानाचा पारा अजून दोन दिवस असाच राहणार असून, त्यानंतर तापमानात थोडी घट होण्याची शक्यता वर्तविण्यात आली आहे. तापमान १ ते २ अंशाने खाली येईल, असे शक्यता वर्तविण्यात आली असल्याची माहिती वसंतराव नाईक मराठवाडा कृषी विद्यापीठातील ग्रामीण कृषी मौसम विभागाचे मुख्य प्रकल्प समन्वयक डॉ. के. के. डाखोरे यांनी दिली आहे.