छत्रपती संभाजीनगर : सिडको एन-४ परिसरात बाहेरगावी गेलेल्या कुटुंबाच्या घराला ‘लक्ष्य’ करीत चोरट्यांनी साडेपाच लाखांचा ऐवज चोरून नेला. २ फेब्रुवारी ते ४ फेब्रुवारीदरम्यान हा प्रकार घडला. याप्रकरणी पुंडलिकनगर पोलिस ठाण्यात गुन्हा दाखल करण्यात आला.

श्रीनिवास आनंद जोशी (वय २८) यांनी तक्रार दाखल केली. जोशी कुटुंबीय २ फेब्रुवारीला सायंकाळी पुणे येथे गेले होते. ४ फेब्रुवारीला सकाळी त्यांना शेजाऱ्याचा कॉल आला. त्यांनी कळवले, की जोशी यांच्या घराचा पाठीमागील दरवाजा उघडा आहे.

जोशी यांनी शेजाऱ्यांना घरात जाऊन खात्री करण्यास सांगितले असता त्यांनी आतमध्ये जाऊन पाहिले असता घरातील साहित्य अस्ताव्यस्त पडलेले असल्याचे त्यांनी जोशी यांना सांगितले. दुपारी जोशी कुटुंबीय घरी परतल्यानंतर त्यांना चोरी झाल्याचे दिसून आले. चोरट्यांनी घराच्या पाठीमागील दरवाजाचे कुलूप तोडून आतमध्ये प्रवेश केला होता.

चोरट्यांनी कानातले, मंगळसूत्र, टॉप्स जोड, तसेच इतर सोन्याचे-हिऱ्याचे दागिने असा ५ लाख ६१ हजारांचा ऐवज चोरून नेला. घटनेची माहिती मिळाल्यानंतर एसीपी रणजित पाटील, पोलिस निरीक्षक राजेश यादव, पीएसआय कल्याण शेळके तसेच पथकाने घटनेस्थळी भेट दिली. श्वानपथक तसेच फिंगरप्रिंटस तज्ज्ञांना पाचारण करण्यात आले. श्वानाने जवळच असलेल्या चौकापर्यंत माग काढला. याप्रकरणी पोलिस ठाण्यात गुन्हा दाखल करण्यात आला.