लोहगाव (जि.औरंगाबाद) : साडेतीन महिन्यांपूर्वी राज्यभर खळबळ उडवून दिलेल्या दरोडा व अत्याचार घटनेनंतर पुन्हा तोंडोळी (ता.पैठण) गावात दोन रात्रीत सहा ठिकाणी चोरीच्या घटना घडल्या आहेत. एका ठिकाणी चोरी करताना शेजारील तरूणांनी एका चोराला हत्यारासह पकडून गावकऱ्यांच्या मदतीने बिडकीन (Bidkin) पोलिसाच्या हवाली केले आहे. तोंडोळी येथे ऑक्टोबरमध्ये एका शेतवस्तीवर मामा-भांजे चोराच्या गँगने रात्री दरोडा टाकून महिलावर अत्याचार केल्याच्या घटनेने राज्यभर खळबळ उडाली असताना बिडकीन पोलिस व स्थानिक गुन्हे शाखेचे (Aurangabad Crime) पाच पथकाने मामा भांजे गँगला पकडून जेरबंद केले होते. साडेतीन महिन्यानंतर पुन्हा एकदा चोरांनी या गावाला लक्ष केल्याची घटना गुरूवार (ता.२८) व शुक्रवार (ता.२९) मध्यरात्री घडल्या. यात अज्ञात चोरट्यांनी रावसाहेब कदम यांची सोन्याची पोत, नगदी रक्कम तर राम गरड यांचे सोन्याचे ओम, नगदी रक्कम, नामदेव गरड यांच्या घरी व दत्तात्रय गरड यांचा बोकड्याची चोरी केली तर भारत गरड याच्या घरामागील दरवाजा उघडण्याच्या प्रयत्न चोरटे करत असताना घरातील लोक जागे झाल्याने चोर पळवून गेले होते. (Tondoli Village Of Aurangabad Again In News, Six Theft Incident Happened)

दुसऱ्या दिवशी रात्री दादासाहेब मस्के यांचा कडीकोंडा तोडून कपाटातील कपडे लत्ता साहित्याची अस्ताव्यस्त करून कानातील सोन्याची रिंग, नाकातील नथ व नगदी दहा हजार रूपयाची चोरी करून या चोरट्यांनी अकील अब्दुल वकील शेख यांच्या घरातील चोरी करताना झालेल्या आवाजाने शेजारचे तरुण जागे झाले असता त्यांनी मोठ्या शिताफीने एका चोरट्याला टाँबी, पकड, दोन घड्याळ रोख रक्कम, सोने मनीसह पकडून गावकऱ्यांच्या मदतीने बिडकीन पोलिसांना बोलावून आरोपी चोर गोरख ड्रायव्हर चव्हाण (रा.बाबरगाव, ता.गंगापूर) याला पोलीसाच्या हवाली केले.

इतर चोर पळून गेले होते. दरम्यान या प्रकरणी बिडकीन पोलीस ठाण्यात अकील शेख व दादासाहेब मस्के यांच्या तक्रारी वरून चोरीचा गुन्हा नोंदविण्यात आला असुन पुढील तपास सहायक पोलिस निरीक्षक संतोष माने,फौजदार छोटूसिंग गिराशे, हवालदार शिवानंद बनगे, योगेश नाडे, रविंद्र पवार करित आहेत.