छत्रपती संभाजीनगर : सिडको पोलिसांनी बीड बायपास सेनानगर येथील हायप्रोफाईल कुंटणखाना उघडकीस आणला आहे. या कुंटणखान्याचा मुख्य सूत्रधार कुख्यात गुन्हेगार तुषार राजपूतला अटक करण्यात आली आहे. पोलिसांनी तपासात राजपुत याची दोन बँक खाती सिझ करीत २८ लाख रुपये होल्ड केले आहे.

सिडको पोलिस ठाण्याच्या पथकाने एन-सात भागातील कुंटणखाना आणि त्यातून मिळालेल्या माहितीवरुन बीड बायपास येथील सेनानगर येथे उच्चभ्रू वसाहतीत चालणारा हायप्रोफाईल कुंटणखाणा उघडकीस आणला. यामध्ये ‘पीटा’ अॅक्टचे गुन्हे दाखल असलेला तुषार राजपूत याच्यासह पाच आरोपींना अटक केली होती. यावेळी उझबेगिस्तान येथील तरुणीसह दिल्लीच्या दोन तरुणींची सुटका केली.

राजपूतवर यापूर्वी देखील अनेक गुन्हे दाखल आहेत. सिडकोच्या पोलिस निरीक्षक गीता बागवडे या प्रकरणी सखोल तपास करीत आहे. तपासात संशयित आरोपी राजपूतने या रॅकेटमध्ये ऑनलाईन ट्रान्झॅक्शनच्या माध्यमातून मोठा आर्थिक व्यवहार केल्याचे समोर आले आहे. एचडीएफसी आणि आयसीआयसीआय बँकेमध्ये त्याची खाती असल्याचे समोर आले आहे. या खात्यामध्ये २८ लाख रुपये असून पोलिसांनी बँकांना ही खाती ‘सीझ’ करण्याबाबत पत्रव्यव्हार केला आहे. पोलिसांच्या या कारवाईमुळे राजपूतच्या आर्थिक नाड्या आवळल्या गेल्या आहेत.