बनोटी (जि.औरंगाबाद) : शॉर्टसर्किटमुळे लागलेल्या आगीत दोन दुचाकींसह दोन दुकाने जळून खाक झाल्याची घटना गोदेंगाव (ता.सोयगाव) येथील चौफुलीवर मंगळवारी (ता.१०) मध्यरात्री घडली. या आगीत जवळपास आठ लाखांचे नुकसान झाल्याची घटना घडली. सोयगाव तालुक्यातील गोदेंगाव चौफुलीवरती मगलसिंग पवार यांचे स्वामी समर्थ ऑटो पार्ट व गॅरेज असून बाजूलाच दीपक पाखले यांचे किराणा दुकान आहे. संध्याकाळी दुकाने बंद करुन मालक घरी गेले. मात्र, मध्यरात्री दोन ते तीन वाजेच्या सुमारास दुकानात शॉर्टसर्किट होऊन आग लागली.

या आगीत दोन्ही दुकानातील सर्व सामान जळून खाक झाले. स्वामी समर्थ ऑटो पार्टमधील दोन दुचाकीसह साहित्य असा एकूण जवळपास ४ लाख ५० हजाराचे नुकसान झाले आहे तर किराणा दुकानातील फ्रिज, कुलर, फर्निचर, आइस्क्रीमचे बॉक्स, तसेच किराणा सामान आदी साहित्य असे जवळपास ४ लाखांचे नुकसान झाले.
माहिती मिळताच मंडळ अधिकारी मारोती धोंडकर, तलाठी जी.आर. चांदे, बनोटी चौकीचे जमादार सुभाष पवार, दिलीप तडवी, श्रीकांत पाटील, विकास दुबेले आदींनी पंचनामा केला. यावेळी पोलिस पाटील मनोहर निकम, मगलसिंग पवार, दिपक पाखले, शरद निकम, अतुल बोरसे, शरद महालपुरे आदी ग्रामस्थांनी मदत देण्याची मागणी केली आहे.

मोठा अनर्थ टळला
गोंदेगाव चौफुली हे गजबजले ठिकाण असून या ठिकाणी छोटे मोठे व्यापारी संकुले आहेत. ग्रामस्थांनी अग्निशमन दलाची गाडी येण्यापूर्वी आग आजूबाजूच्या दुकानांना कवेत घेऊ नये यासाठी प्रयत्नांची पराकाष्ठा केल्यानेच आग नियंत्रण राखण्यात यशस्वी झाल्याने मोठी हानी होण्यापासून टळली.

संपादन - गणेश पिटेकर