कन्नड : उंबरखेडा येथील योजनेची पाइपलाइन रोखून सामान जप्त केल्यामुळे संतप्त ग्रामस्थांनी हिवरखेडा (गौताळा) येथील वन्यजीव विभागाच्या कार्यालयावर बुधवारी दुपारी हल्ला केला. यावेळी धक्काबुक्की झाल्याने अत्यवस्थ झाल्याने वनपालाला छत्रपती संभाजीनगर येथील रुग्णालयात दाखल करण्यात आले आहे.

पी.एम. बर्डे असे या वनपालाचे नाव आहे. सरपंच रूमदेव चव्हाण यांनी सांगितले की, उंबरखेडा गावात तीव्र पाणी टंचाई असून सध्या वीस दिवसाआड पाणी पुरवठा होतो. जनजीवन मिशन अंतर्गत एक कोटी तेरा लाख ब्याऐंशी हजार रुपये निधी मंजूर झाला. गावापासून सहा किलोमीटर अंतरावरील धरणात विहीर खोदून पाइप लाईन करण्यात येत आहे. वन्यजीव विभागाने या कामात सातत्याने अडथळा आणला.

विहिरीलाही परवानगी देण्यास विलंब केला. विहीर केली. आता वन्यजीव विभागाने पाइप लाईन करण्यास विरोध केला. आम्ही पाइपलाइन खासगी शेतकऱ्यांच्या शेतातून करत आहोत. तरीही कर्मचाऱ्यांनी पाइपलाइनचे साहित्य, जनरेटर, पाइप जप्त केले. त्यामुळे संतप्त ग्रामस्थांनी वन्यजीव विभागाच्या कार्यालयावर हल्लाबोल केला. वनपाल बर्डे यांनी सांगितले की, वन अधिनियमनुसार वनविभागाच्या हद्दीत खोदकाम करता येत नाही. तसेच जप्त केलेले साहित्य परत करण्याचा अधिकार मला नाही.

अन् ग्रामस्थांचा संताप अनावर झाला

बुधवारी हिवरखेडा गौताळा येथील वन्यजीव विभागाच्या कार्यालयावर उंबरखेडा ग्रामस्थांनी महिलांसह हल्ला बोल केला. महिलांसह ग्रामस्थांनी वनपाल बर्डे यांना जाब विचारून धक्काबुक्की केली. संतप्त ग्रामस्थांनी कार्यालयाच्या खिडक्या, टेबलवर आदळ आपट करून घोषणाबाजी केली. यावेळी मोहन मांगू पवार, पद्माबाई राठोड, पार्वती राठोड, राहुल राठोड, प्रवीण चव्हाण, ईश्वर चव्हाण, विलास राठोड, नीलाबाई पवार, विकास पवार, मूलचंद चव्हाण आदींसह दोनशेहून अधिक ग्रामस्थ उपस्थित होते.