नांदेड : मुलीच्या लग्नासाठी जीपीएफमधून एका पोलिसानी काढलेले पाच लाख रुपये अनोळखी चोरट्यानी भर दिवसा लंपास केले. ही घटना देगलूर शहरातील नवा मोंढा भागातील भाग्यलक्ष्मी बँकेसमोर शनिवारी (ता.20) दुपारी दीडच्या सुमारास घडली. 
मुक्रमाबाद ठाण्यात कार्यरत असलेला देगलूर न्यायालयातील पैरवी अधिकारी गुणाजी सुरनर (ब.न. 2000) यांनी आपल्या मुलीच्या लग्नासाठी जीपीएफमधून पाच लाख रुपये काढून घेतले.

पाच हजाराच्या एक हजार नोटांचे बंडल त्यांनी एका बॅगमध्ये टाकून दुचाकी (एमएच26-एव्ही-6014) च्या डिक्कीत ठेवले. भाग्यलक्ष्मी बँकेसमोर एका एटीमधून चार हजार रुपये त्यांना काढायचे होते. म्हणून त्यांनी आपली दुचाकी एटीएमसमोर उभी करुन एटीएममध्ये गेले. त्यांच्या मागावर असलेल्या एका चोरट्याने डीक्की हातोहात फोडून पाच लाखाची बॅग लंपास केली.

हा प्रकार सिसीटीव्हीमध्ये कैद झाला. सुरनर यांनी लगेच पोलिस ठाणे देगलुर गाठले. तिथे घडलेला प्रकार पोलिसांना सांगितल्यानंतर लगेच वरिष्ठ अधिकारी व कर्मचाऱ्यांनी घटनास्थळाकडे धाव घेतली. फुटेज तपासले असता त्यात एक 20 ते 22 वयोगटातील चोरटा बॅग घेऊन जात असल्याचे दिसत आहे. गुणाजी सुरनर यांच्या फिर्यादीवरुन देगलूर ठाण्यात गुन्हा दाखल कऱण्यात आला आहे. तपास फौजदार क्षिरसागर हे करीत आहेत.