परळी वैजनाथ (जि.बीड) : परळी-गंगाखेड रस्त्यावर एका विचित्र अपघातात दुचाकीस्वार जाग्यावर ठार, तर एकजण गंभीर जखमी झाला आहे. परळी गंगाखेड रस्त्यावर औष्णिक विद्युत केंद्राच्या मिनी स्टोअरसमोर रविवारी (ता.चार) दुपारी तीनच्या सुमारास सुनील सुभाष उदावंत आपल्या मित्र उमेश विठ्ठल टाक याच्यासोबत परळीकडे येत असताना दोन दुचाकी समोरासमोर धडकल्या व गंगाखेडहून येणारा दुचाकीस्वार सुनील सुभाष उदावंत (वय ३५) हा बाजूने जाणाऱ्या राखेच्या टँकरखाली गेल्याने या दुचाकीस्वाराच्या अक्षरशः चिंधड्या झाल्या होत्या.

अपघातस्थळी मासांचा खच पडलेला दिसून येत होता. दुचाकीस्वारासोबत असलेला उमेश विठ्ठल टाक हा गंभीर जखमी झाला असून त्याला उपचारासाठी उपजिल्हा रुग्णालयात दाखल करण्यात आले आहे. या संदर्भात संभाजीनगर पोलिसांनी घटनास्थळी धाव घेऊन पंचनामा केला असून दुचाकी व राखेचे टँकर ताब्यात घेतले आहे.

संपादन - गणेश पिटेकर