गेवराई (जि.बीड) - शहरापासून जवळच असलेल्या दोन वेगवेगळ्या भागात चोरटयांनी शनिवारी (ता.27) भरदिवसा दोन व्यापाऱ्यांना पंधरा लाखांना लुटल्याचा प्रकार समोर आला आहे. यामध्ये एका कापसाच्या व्यापाऱ्यास दहा लाखाला तर सराफा व्यापाऱ्यास पाच लाख रुपयास लुटले असुन संबंधीत चोरट्यांनी पाच लाख रुपये किमतीचे अंदाजे पन्नास ग्रॅम सोने पळवल्याची माहिती समजते आहे. या प्रकरणी गेवराई पोलिस ठाण्यात गुन्हा दाखल करण्याची प्रक्रिया उशिरापर्यत सुरु होती. या दोन घटनांमुळे व्यापाऱ्यांमध्ये दहशतीचे वातावरण निर्माण झाले आहे.

वाचा - औरंगाबाद शहरातील शाळा, शिकवण्या १५ मार्चपर्यंत बंदच

तालुक्यातील दैठण फाट्यावरून गेवराईकडे येत असतांना सराफ व्यापारी चंद्रकांत उदावंत यांच्या बॅगमधील पन्नास ग्रॅम सोने चोरटयांनी मोटारसायकलवरून येत बॅग हिसकावून घेत लुटले.यातील सोने पाच लाखांचा रुपये किमतीचे होते.तर नवीन नागझरी फाटा येथील हॉटेल डिसेंटजवळ कापूस व्यापारी हरिभाऊ गुट्टे (रा.वैजापूर, जि.औरंगाबाद ) यांच्याकडे कापसाची दहा लाखांची रक्कम बॅगमध्ये होती.ही रक्कम या चोरटयांनी सिनेस्टाईल चोरी करीत लांबवल्याने खळबळ उडाली.दोन्ही घटना दुपारी अडीच्या दरम्यान घडल्या असून  दिवसाढवळ्या दोन्ही घटना फिल्मीस्टाईलने घडल्यानं सर्वत्र खळबळ उडाली आहे. सदर फिर्यादी यांनी पोलीसांत धाव घेतली असुन संबंधीत प्रकरणात गुन्हा दाखल करण्याची प्रक्रिया रात्री उशिरापर्यंत सुरु होती.

संपादन - गणेश पिटेकर