बीड : पत्नीचा मृतदेह जमिनीवर तर पतीचा गळफास घेतलेल्या स्थितीतील मृतदेह नाळवंडी (ता. बीड) येथे गुरुवारी (ता. चार) सकाळी आढळला. पत्नीचा गळा आवळून खून करून पतीने आत्महत्या केली असावी, असा संशय असून पोलिसांकडून तपास सुरु आहे.

काशिबाई बाबासाहेब म्हेत्रे (वय ३५) व बाबासाहेब रावसाहेब म्हेत्रे (वय ४०) अशी या दोघांची नावे आहेत. माहिती मिळताच ग्रामस्थांनी घटनास्थळी धाव घेतली. काशीबाई म्हेत्रे यांचा मृतदेह घरातील खोलीत जमिनीवर पडलेला होता तर बाबासाहेब म्हेत्रे यांचा मृतदेह याच खोलीत गळफास घेतलेल्या स्थितीत होता.

खोलीला आतून कडी होती, बाजूच्या खोलीत त्यांची दोन्ही मुले झोपलेली होती. पिंपळनेर पोलिस ठाण्याचे निरीक्षक भारती व त्यांच्या सहकाऱ्यांनी घटनास्थळी भेट दिली. खून करून आत्महत्येचा संशय असून पोलिस तपास करीत आहेत. जिल्हा रुग्णालयात दोन्ही मृतदेहांची उत्तरीय तपासणी झाली.