आष्टी : तालुक्यातील संजय गांधी व श्रावण बाळ समिती अंतर्गत नव्याने मंजूर केलेल्या लाभार्थींची यादी दोन महिने उलटूनही अद्याप प्रसिद्ध झालेली नाही. त्यामुळे गरजू लाभार्थींची प्रकरणे मंजूर होऊनही त्यांना अनुदानापासून वंचित राहण्याची वेळ आली आहे. कोरोना प्रादुर्भावामुळे दोन ते अडीच वर्षे या समितीची बैठकच होऊ शकली नाही.

ता. १७ जुलैला समितीची बैठक झाली. या बैठकीत सुमारे १,७०० नवीन प्रकरणांना मंजुरी देण्यात आली. नियमानुसार मंजूर प्रकरणांची यादी लगेचच तहसील कार्यालयाच्या फलकावर डकविणे अपेक्षित होते. मात्र, दोन महिने उलटूनही अद्याप ही यादी प्रसिद्ध करण्यात आलेली नाही. समिती अध्यक्ष व सदस्यांनी सर्व संमतीने विधवा, अपंग व श्रावणबाळ समिती लाभार्थींची प्रकरणे मंजूर केली आहेत. दरम्यान, लाभार्थींची प्रकरणे मंजूर केल्यानंतर ता. २८ जुलैला यमाजी दशरथ खंडागळे व दादासाहेब आश्रुबा गोल्हार (रा. कापसी) यांनी यादीवर आक्षेप घेत तहसील कार्यालयात तक्रार दाखल केलेली आहे.

परंतु, या आक्षेपांबाबतही अद्याप पुढील कार्यवाही झालेली नाही. कोरोना काळात गोरगरीब व वंचित लाभार्थींना तातडीने अनुदान मिळणे गरजेचे आहे. परंतु, प्रशासकीय पातळीवर यादीच प्रसिद्ध न झाल्याने लाभार्थी अनुदानापासून वंचित राहिले आहेत. याबाबत काय तो निर्णय घेऊन मंजूर लाभार्थींची यादी तत्काळ प्रसिद्ध करण्यासंदर्भात आमदार आजबे यांनीही अधिकाऱ्यां ना सूचना दिलेल्या आहेत. समिती अध्यक्ष व सदस्यांनीही अधिकाऱ्यांना अनेकवेळा विनंती केली. परंतु, अद्याप यादी प्रसिद्ध झाली नाही.

"पालकमंत्री धनंजय मुंडे व आमदार बाळासाहेब आजबे यांनी समिती गठीत केल्यानंतर तालुक्यातील सर्व प्रकरणांसंदर्भात बैठक घेतली व नवी १,७०० लाभार्थींची प्रकरणे मंजूर केली. परंतु, यादी प्रसिद्धीस विलंब होत आहे. मंजूर लाभार्थींची यादी रविवारपर्यंत (ता. २६) प्रसिद्ध न केल्यास मी सोमवारपासून (ता. २७) तहसील कार्यालयासमोर उपोषणास बसणार आहे."- शिवाजी नाकाडे, सदस्य, संजय गांधी व श्रावणबाळ योजना समिती

"नव्याने मंजूर करण्यात आलेल्या प्रकरणांच्या याद्या तयार करण्याचे कामकाज सध्या सुरू आहे. येत्या चार-पाच दिवसांत याद्या प्रसिद्ध करून तहसील कार्यालयात लावण्यात येणार आहेत."-नीलिमा थेऊरकर, नायब तहसीलदार, आष्टी