बीड - राज्य शासन एकीकडे हे वर्ष मराठवाडा मुक्ती संग्रामाचे अमृत महोत्सवी वर्ष म्हणून साजरे करीत आहे; दुसरीकडे मात्र ज्यांनी मराठवाडा मुक्ती संग्रामाच्या लढ्यात बलिदान दिले, त्याच स्वातंत्र्य सैनिकांच्या स्मारकाची दुरवस्था झाली आहे. स्मारक स्तंभाला मोठे तडे गेले असून, ते तत्काळ दुरुस्त करून नवीन पंचायत समिती परिसरात स्मारक उभारण्याची मागणी डॉ. गणेश ढवळे यांनी केली आहे.

देशाच्या स्वातंत्र्यानंतरही निजामशाहीच्या ताब्यात असलेला मराठवाडा संस्थान मिळवण्यासाठी मोठा लढा अनेकांनी उभा केला होता. या लढ्यात अनेकांनी बलिदान दिले तर, अनेक सैनिकांनी कारावास भोगला. या लढ्यातील जुन्या पंचायत समिती कार्यालय परिसरातील २३ हुतात्म्यांच्या स्मारकाची दुरवस्था झाली आहे.

एकीकडे अमृत महोत्सवी वर्ष साजरे करताना जिल्हाभरात विविध उपक्रम राबविले जात आहेत. शालेय स्तरापासून ते महाविद्यालय स्तरापर्यंत मुलांना मुक्तीसंग्रामाचे महत्त्व सांगणारा एका तासाचा माहितीपट गावोगावी दाखविण्याचे जिल्हा प्रशासनाचे नियोजन आहे. यासह विविध व्याख्याने, स्पर्धांचे आयोजन केले जाणार आहे. जिथे मुक्ती संग्रामातील महत्त्वाच्या घटना घडल्या, त्याठिकाणी स्मृती स्तंभ उभारण्यात येणार आहेत.

नवे स्मारक उभारा डॉ. ढवळे

जुन्या पंचायत समिती परिसरातील दुरवस्था झालेल्या स्वतंत्र सैनिकांच्या स्मारकाची तत्काळ दुरुस्ती करण्यात यावी, नवीन पंचायत समिती परिसरात तातडीने नव्याने स्मारक उभारावे, अशी मागणी सामाजिक कार्यकर्ते डॉ. गणेश ढवळे यांनी जिल्हाधिकाऱ्यांकडे निवेदनाद्वारे केली आहे.