भोकरदन (जालना) : इंधन दरवाढीच्या निषेधार्थ काँग्रेस पक्षाच्या वतीने आज सोमवारी (ता. 10) भारत बंदची हाक देण्यात आली आहे. या पार्श्वभूमीवर भोकरदन शहरात रॅली काढून व्यापाऱ्यांना बंदचे आवाहन करण्यात येत आहे. या रॅलीत राष्ट्रवादी काँग्रेसचे नेतेही सहभागी झाले आहे.

देशात पेट्रोल, डिझेल, घरगुती वापराचा गॅस या जीवनावश्यक वस्तूंच्या किमती वाढत आहेत. वारंवार होणाऱ्या इंधन दरवाढीमुळे सामान्य नागरिकांचे कंबरडे मोडले आहे. वाढत्या महागाईमुळे देशातील जनता त्रस्त झाली आहे. मात्र, महागाई कमी होण्याऐवजी वाढतच आहे. त्यामुळे या विरोधात सोमवारी देशव्यापी बंद पुकारण्यात आला असून, सोमवारी भोकरदन शहरातील छत्रपती शिवाजी महाराज चौकातुन विरोधी पक्षाच्या वतीने रॅली काढण्यात आली. यावेळी सरकार विरोधात जोरदार घोषणाबाजी करण्यात आली. सदरील रॅली शिवाजी महाराज चौक, डॉ. बाबासाहेब आंबेडकर चौक, महाराणा प्रताप चौक, महात्मा फुले चौक, रोकडा हनुमान मार्गे सराफा मार्केट व मुख्य बाजारपेठ नवीन भोकरदन आदी भागातून रॅली काढण्यात आली. रॅली दरम्यान व्यापाऱ्यांनी दुकाने बंद ठेवून बंदला संमिश्र प्रतिसाद दिला.